Уорен Баффет фонд биржаларидаги вазиятни қимор ўйнашга қиёслади
Миллиардер Уолл-стрит инвесторлар орасида хавфли хатти-ҳаракатларни рағбатлантираётганидан шикоят қилди.
Berkshire Hathaway конгломерати раҳбари, 91 ёшли миллиардер Уоррен Баффет акциядорларнинг йиллик қурултойида «сўнгги бир неча йил ичида бозорларнинг аҳволи қимор уйига ўхшаб кетгани»ни айтди. Баффетдан The Wall Street Journal иқтибос келтирмоқда.
Қимматли қоғозлар бозори ўзгарувчанлигининг ўсиши битта ижобий таъсир кўрсатади, дейди миллиардер: Бу Berkshire Hathaway’га сармоя киритиш учун паст баҳоланган компанияларни топишга имкон берди.
«Бозорлар ақлга сиғмайдиган ҳаракатлар қилади ва вақти-вақти билан Berkshire нимадир қилиш имкониятига эга бўлади», — деди Баффет Reuters агентлигига.
Шу билан бирга, миллиардер Уолл-стрит инвесторлар орасида хавфли хатти-ҳаракатларни рағбатлантираётганидан шикоят қилди.
АҚШнинг энг йирик компаниялари бозор спекуляцияси учун «покер чиплари»га айланди, деди Баффет: Брокерлар инвестиция қилишдан кўра биржада «тикиш» қилганларида кўпроқ пул ишлайди, дея қўшимча иқтибос келтирди CNBC.
Баффет акциядорлар қурултойида Berkshire Hathaway компаниясининг янги сармояси ҳақида ҳам гапирди.
Хусусан, у Американинг Chevron энергетика компаниясидаги улушини қарийб олти баробар оширган: 2021 йил охирида Berkshire Hathaway улуши 4,5 миллиард долларни ташкил этган бўлса, ҳозир у 25,9 миллиард долларга етди.
Чеврон акциялари Apple, American Express ва Bank of America улушлари билан бирга Berkshire Hathaway портфелидаги энг йирикларидан бирига айланди.