Миллиардер Уоррен Баффетнинг Berkshire Hathaway компанияси қимматли қоғозлар бозорларидаги пасайиш фонида бир қанча компанияларнинг акцияларини сотиб олди. Бу ҳақда The Wall Street Journal регуляторлар маълумотларига таяниб ёзмоқда.

Хусусан, ўтган ҳафта компания Occidental Petroleum нефть компаниясининг 900 мингдан ортиқ акцияларини сотиб олди. Berkshire февраль ойи охирида компания акцияларини сотиб олишни бошлади ва Occidental Petroleum энди Баффетнинг энг яхши 10 та сармоясидан бири бўлиб турибди.

Бундан ташқари, Berkshire Chevron Corp ва Activision Blizzard’даги улушларини оширди ва Apple’даги мавқеини кўтаришда давом этди. Апрель ойи охирида Bloomberg хабар беришича, Berkshire Hathaway биринчи чоракда тахминан 41 миллиард долларлик акцияларни сотиб олган. Ўша вақтга келиб компания Activision Blizzard’даги улушини 9,5 фоизгача оширди.

Инвесторлар Berkshire яна нимани сотиб олгани ва сотгани ҳақида маълумотни АҚШ Қимматли қоғозлар комиссиясига (СEC) тақдим этганда билиб олишлари мумкин бўлади.

Нашрнинг ёзишича, компания буни 16 май, душанба куни амалга оширади. WSJ эътироф этишича, бу баёнот бозордаги тартибсизликлар Berkshire’нинг харажатларини оширишга имкон берганини кўрсатади.

Баффет узоқ вақтдан бери инвесторларга «бошқалар қўрққанида очкўз бўлишни» маслаҳат бериб келади.

Инвесторларнинг фикрича, Berkshire бозорлар пасайиб бораётган бир пайтда ўзининг улкан акциялари портфелини қўшиш учун яхши ҳолатда.

Аввалроқ Баффет фонд биржаларидаги вазиятни қимор ўйнашга қиёслаганди.

Berkshire Hathaway

Berkshire Hathaway узоқ вақтдан бери технология компанияларига сармоя киритишда эҳтиёткор бўлиб келган, бироқ 2016 йилда компания Apple’нинг 1 миллиард долларлик улушини сотиб олди ва 2021 йил охирига келиб у 5,6 фоизга ошди. Ўша пайтда у тахминан 161 миллиард долларга баҳоланган ва Berkshire’нинг энг йирик активларидан бири эди.

Март ойида эса Berkshire Hathaway 2016 йилдан кейинги энг йирик битимини ёпиб, Alleghany суғурта компаниясини 11,6 миллиард долларга сотиб олишга рози бўлди.

Шунингдек, ташкилот компьютер ва принтерлар ишлаб чиқарувчи HP компаниясининг 11 фоиздан ортиқ улушини сотиб олди.

Баффет Forbes-2022 маълумотларига кўра дунёнинг бешинчи энг бой одами саналади. Рўйхат тузилган пайтда унинг бойлиги 118 миллиард долларга баҳоланган эди.