Уорен Баффетнинг компанияси HP’нинг энг йирик акциядорига айланди
Деярли 121 миллион акцияни ўз ичига олган пакет қиймати тахминан 4,2 миллиард долларга тенг.
Миллиардер Уоррен Баффетнинг Berkshire Hathaway компанияси компьютер ва принтерлар ишлаб чиқарувчи HP компаниясининг 11 фоиздан ортиқ улушини сотиб олди. Бу ҳақда The Wall Street Journal АҚШ қимматли қоғозлар ва биржалар комиссияси сайтидаги маълумотларга таяниб ёзмоқда.
Деярли 121 миллион акцияни ўз ичига олган пакет қиймати тахминан 4,2 миллиард долларга тенг. Тошкент вақти билан соат 16:23 ҳолатига кўра, HP акциялари бозордан олдинги савдоларда 13,75 фоизга ошиб, 39,71 долларни ташкил қилди.
WSJ қайд этишича, харид Berkshire Hathaway’ни HP компаниясининг энг йирик акциядорига айлантирди. Бунгача компаниянинг энг йирик инвесторлари Vanguard Group ва BlackRock эди. Уларнинг улушлари мос равишда деярли 11 ва 10 фоиздан бир оз кўпроқни ташкил этди.
Berkshire Hathaway узоқ вақтдан бери технология компанияларига сармоя киритишда эҳтиёткор бўлиб келган, бироқ 2016 йилда компания Apple’нинг 1 миллиард долларлик улушини сотиб олди ва 2021 йил охирига келиб у 5,6 фоизга ошди. Ўша пайтда у тахминан 161 миллиард долларга баҳоланган ва Berkshire’нинг энг йирик активларидан бири эди.
Март ойида эса Berkshire Hathaway 2016 йилдан кейинги энг йирик битимини ёпиб, Alleghany суғурта компаниясини 11,6 миллиард долларга сотиб олишга рози бўлди.
Баффет Forbes-2022 маълумотларига кўра дунёнинг бешинчи энг бой одами саналади. Рўйхат тузилган пайтда унинг бойлиги 118 миллиард долларга баҳоланган эди.