OPEC бош котиби Муҳаммад Баркиндо 5 июль куни 64 ёшида вафот этди. Баркиндо аслида ким эди, вафотига қадар қандай лавозимларда ишлаган, қаерларда таҳсил олган — Kommers.uz мақоласида.
Таълим
Муҳаммад Сануси Баркиндо 1959 йил 20 апрелда Нигериянинг Йола шаҳрида туғилган.
У Аҳмаду Белло университети (Нигерия), Оксфорд нефть ва энергетика коллежининг (Буюк Британия) нефть иқтисодиёти ва Вашингтон университетини молия факультетини тамомлаган.
Карьеранинг илк босқичи
Муҳаммад 1982–1985 йилларда Нигерия кон корпорацияси бошқарувида ишлаган. У кон саноати вазирининг, кейинроқ нефть ресурслари вазири Рилвану Лукмоннинг ёрдамчиси бўлиб ҳам фаолият юритган. 1986 йилдан OPEC’даги Нигерия делегацияси аъзоси.
Баркиндо 1991 йилда БМТнинг «етмиш етти кишилик гуруҳи» ва Хитойнинг иқлим ўзгариши бўйича музокараларида техник делегацияни бошқарган.
У БМТ доиравий конвенцияси ва унга Киото протоколининг ҳаммуаллифи бўлди.
Муҳаммад Баркиндо 1993 йилдан 2008 йилгача у OPEC’нинг нефть бозорлари барқарорлигини таъминлаш бўйича комиссиясида Нигериянинг миллий вакили бўлган.
Нефть соҳасидаги фаолият
Марҳум 1993 йилдан 2010 йилгача Нигерия миллий нефть корпорациясида (NNPC) ишлаган. Компания Нигериядаги барча нефтнинг камида 90 фоизини ишлаб чиқаради.
Шунингдек, у NNPC нефть ва газ савдо департаментини, компаниянинг Лондондаги офисини ва Нигериядаги суюлтирилган газни суюлтириш шўба корхонасини (Shell, Total ва Еni нефть корпорациялари билан қўшма корхона) бошқарган.
Баркиндо 2009-2010 йилларда NNPC’га раҳбарлик қилган.
OPEC’даги фаолият
Муҳаммад Баркиндо 2006 йилдан буён OPEC бош котиби лавозимида ишлаб келаётганди. ОАВ хабарларига кўра, у ташкилотга кирмаган давлатлар билан мулоқотни ёқлаган.
У 2016 йил 2 июнда OPEC бош котиби лавозимига қайта сайланганди.
Баркиндо Буюк Британия империяси рицар-қўмондон ордени соҳиби, Йола технология университети фан доктори ҳисобланади.
