EuroChem ва СУЭК асосчиси, россиялик миллиардер Андрей Мельниченко 2021 йилда БАА фуқаролигини олган. Бу ҳақда Forbes нашрига унинг вакили хабар берди.
Унинг сўзларига кўра, 2021 йил январь ойида БАА ҳукумати фуқаролик ва паспортлар тўғрисидаги қонунга ўзгартириш киритиб, инвесторлар, мутахассислар, олимлар ва зиёлиларга Амирликлар фуқаролигини олиш имконини берган.
«Андрей Мельниченкога [фуқаролик олиш таклифи билан] Амирликлар расмийлари мурожаат қилди ва у таклифни миннатдорлик билан қабул қилиб, 2021 йилда БАА фуқаролигини олди», — деди миллиардернинг вакили.
Вазиятдан хабардор манбанинг аниқлик киритишича, санкциялар жорий этилганидан бери Мельниченко ва унинг оиласи Рас ал-Хайма амирлигида яшаб келган. Тадбиркор Россия фуқаролигини ҳам сақлаб қолади.
Мельниченко ва санкциялар
Мельниченко март ойи бошида Европа Иттифоқи санкциялари остида қолган эди. ЕИ 24 февраль куни Россиянинг Украинага ҳужум бошланганидан кейин Владимир Путин билан учрашувда Мельниченконинг ҳам иштирок этганини ушбу санкцияларни жорий этишнинг сабабларидан бири сифатида келтирди.
«Мельниченко Россия ҳукумати билан яқин алоқада бўлган россиялик тадбиркорларнинг энг нуфузли доирасига мансуб», — дея таъкидлаган ЕИ санкцияларни асослар экан.
Март ойи ўрталарида Буюк Британия тадбиркорга қарши санкциялар киритган эди. Швейцария ҳам тадбиркорга нисбатан Европа Иттифоқи санкцияларини жорий қилган.
Италия молиявий гвардияси 12 март куни ЕИ санкцияларини амалга ошириш доирасида Мельниченконинг Sailing Yacht А яхтасини ҳибсга олди. Триеста портида тахминий қиймати 142 миллионлик 530 метрли кема ушланди.
Шунингдек, 17 март куни Мэн ороли расмийлари Мельниченкога тегишли иккита яхта — Sailing Yacht А ва 119 метрли моторли яхта А Yacht’ни рўйхатдан ўтказишни бекор қилгани маълум бўлди. Рўйхатдан ўтказишни бекор қилиш кеманинг энди қонуний равишда денгизга чиқа олмаслигини англатади.
Кейинчалик Андрей Мельниченко Ғарб санкциялари бўйича судга ариза бериши маълум қилинди. Миллиардернинг рафиқаси Александра ҳам Европа Иттифоқи санкцияларига суд орқали эътироз билдирмоқчи экани таъкидланди.
Аввалроқ россиялик миллиардер Мельниченко Украинадаги можаро туфайли озиқ-овқат тақчиллигидан огоҳлантиргани хабар қилинганди.
