Россиялик миллиардер Мельниченко Украинадаги можаро туфайли озиқ-овқат тақчиллигидан огоҳлантирди
Миллиардер зудлик билан тинчлик кераклигини таъкидлади.
Россиянинг Украинага ҳарбий ҳужуми озиқ-овқат инфляциясининг тезлашишига ва глобал озиқ-овқат танқислигига олиб келиши мумкин. Бу ҳақда яқин вақтгача минерал ўғитлар ишлаб чиқарувчи «Еврохим» компаниясининг бенефициари бўлган миллиардер Андрей Мельниченко маълум қилди.
«Ушбу инқироз қурбонларидан бири қишлоқ хўжалиги ва озиқ-овқат соҳаси бўлади. Бу аллақачон деҳқонлар сотиб ололмайдиган даражага келган ўғитлар нархининг кўтарилишига олиб келди. Энди бу Европада озиқ-овқат инфляциясининг янада ошишига ва дунёдаги энг қашшоқ мамлакатларда озиқ-овқат тақчиллигига олиб келади», — деб башорат қилди Мельниченко.
У Украинада содир бўлаётган воқеаларни «ҳақиқатан ҳам фожиали» деб атади ва зудлик билан тинчлик зарурлигини таъкидлади.
«Миллати рус, туғилиши беларус ва қони украин бўлганим учун қардош халқлар қандай уришаётгани ва ҳалок бўлаётганини кўриб, қаттиқ изтироб ва саросимага тушаман», — деди тадбиркор.
Reuters агентлигининг қайд этишича, Мельниченко Беларусда туғилган, онаси эса украиналик.
Мельниченко 9 март куни Россиянинг Украинага ҳужумига жавобан Европа Иттифоқи санкциялари остида қолди. Шундан сўнг тадбиркор СУЭК ва «Еврохим» компаниялари директорлар кенгаши аъзоси ҳамда ижрочи бўлмаган директори лавозимини тарк этишга ва компаниялардаги улушини ноль фоизгача камайтиришга мажбур бўлди.
Санкцияларга қадар миллиардер «Еврохим»нинг 100 фоиз ва СУЭКнинг 92,2 фоиз акцияларига эгалик қилган. Forbes’га берган шарҳида Мельниченко Украинадаги воқеаларга алоқаси йўқлигини таъкидлаб, ўзига нисбатан қўйилган чекловларни абсурд деб ҳисоблашини маълум қилган.
Аввалроқ Италия ҳукумати ЕИ санкциялари доирасида Мельниченконинг 142 метрлик Sailing Yacht А яхтасини ҳибсга олгани хабар қилинганди. Кема дунёдаги энг йирик хусусий елканли яхта ҳисобланади, унинг нархи 530 миллион еврога баҳоланмоқда.
Шунингдек, миллиардер Мельниченко 2021 йил бизнес учун қандай ўтганини баҳолагани хабар қилинди.