«Ҳамкорбанк» жисмоний ва юридик шахслар учун деярли барча турдаги кредитлар беришни тўхтатди. Банкнинг расмий сайтида кўплаб кредитлар тақдим этиш вақтинча тўхтатилгани кўрсатилган.
Банкнинг маҳсулотлари ичида жисмоний шахслар учун автокредит, микроқарз, истеъмол ва таълим кредитлари мавжуд бўлиб, улардан фақат автокредит берилаётганини кўриш мумкин. Шунингдек, ипотека кредитларини бериш ҳам тўхтатилган.
Бизнес учун эса микрокредит, кичик кредит, автокредит, агрокредит, корпоратив кредит, бизнес-овердрафт, ҳорижий кредит линиялари ҳисобидан кредит, банк кафолати ва лизинг мавжуд бўлиб, уларнинг барчасини тақдим этиш тўхтатилган.
«Ҳамкорбанк»нинг Kommers.uz’га маълум қилишича, банкда кредит портфелининг сифатини ошириш мақсадида инвентаризация бошланган. Шу сабабли кредитларнинг деярли барча турини бериш вақтинчалик тўхтатилган.
Аввалроқ «Ҳамкорбанк» санкция остида қолган «Сбербанк» билан ўтказмаларни тўхтатганди. Пул ўтказмалари тўхтатилиши 25 февралдан кучга кирган.
Шунингдек, кейинчалик банк «Сбербанк» орқали ўтказмалар қабул қилишни тиклагани ҳақида хабар берилди. Техник ишлар тўлиқ бартараф этилганлиги сабабли ўтказмалар қабул қилиш тиклангани айтилганди.
