HamkorBank санкция остида қолган «Сбербанк» орқали ўтказмалар қабул қилишни тиклади
Техник ишлар тўлиқ бартараф этилганлиги сабабли ўтказмалар қабул қилиш тикланган.
«Сбербанк Онлайн» иловаси орқали юборилаётган ўтказмаларни HamkorBank пластик карталарига кирим қилиш имконияти қайта тикланди. Бу ҳақда банк сайтида хабар қилинган.
«Сизларга шуни маълум қиламизки, 25.02.2022 йилги техник ишлар тўлиқ бартараф этилганлиги сабабли ‘Сбербанк Онлайн’ иловаси орқали юборилаётган ўтказмаларни HamkorBank пластик карталарига кирим қилиш имконияти қайта тикланди», дейилади хабарда.
Аввалроқ HamkorBank ортидан «Ипак йўли» банки ҳам «Сбербанк» билан ўтказмаларни тўхтатгани хабар қилинганди.
Қайд этиш керакки, «Сбербанк», «Райффайзенбанк», ВТБ, «Ростелеком» банкларининг иловалари фаолиятида узилишлар ҳам кузатилган.
Бунга қадар Америка Қўшма Штатлари Россиянинг Украинадаги ҳарбий ҳаракатларига қарши чоралар кўриш мақсадида «Сбербанк», «Газпромбанк», «Открытия» Банклари, «Совкомбанк», «Новикомбанк»га қарши санкциялар киритаётгани ҳамда ушбу чекловлар мамлакат банк секторининг 80 фоизини қамраб олиши хабар қилинганди.
Шунингдек, Европа Иттифоқи Россиянинг Шарқий Европада олиб бораётган ҳарбий ҳаракатлари фонида санкцияларнинг иккинчи пакетини эълон қилди. Унга кўра, янги чекловлар Россия банк бозори ва муҳим давлат компанияларининг 70 фоизига таъсир қилади, нефтни қайта ишлаш заводларини модернизация қилишни ва самолёт қисмларини етказиб беришни тўхтатади.
