HamkorBank санкция остида қолган «Сбербанк» билан ўтказмаларни тўхтатди
Пул ўтказмалари тўхтатилиши 25 февралдан кучга кирди.
«Сбербанк Онлайн» иловаси орқали Hamkorbank пластик карталарига юборилаётган маблағларни карталарга кирим қилиш вақтинчалик тўхтатилди. Бу ҳақда банк сайтида хабар берилган.
«Ҳурматли мижозлар! Банк тизимларида олиб борилаётган техник ишлар ва мижозларимизнинг молиявий йўқотишларига йўл қўймаслик мақсадида «Сбербанк Онлайн» иловаси орқали Hamkorbank пластик карталарига юборилаётган маблағларни карталарга кирим қилиш 25.02.2022 йил кунидан вақтинчалик тўхтатилди. Ноқулайлик учун узр сўраймиз», дейилади хабарда.
Қайд этиш керакки, айни вақтда «Сбербанк», «Райффайзенбанк», ВТБ, «Ростелеком» банкларининг иловалари фаолиятида узилиш кузатилмоқда.
Аввалроқ Америка Қўшма Штатлари Россиянинг Украинадаги ҳарбий ҳаракатларига қарши чоралар кўриш мақсадида «Сбербанк», «Газпромбанк», «Открытия» Банклари, «Совкомбанк», «Новикомбанк»га қарши санкциялар киритаётгани ҳамда ушбу чекловлар мамлакат банк секторининг 80 фоизини қамраб олиши хабар қилинганди.
Бундан ташқари, Европа Иттифоқи Россиянинг Шарқий Европада олиб бораётган ҳарбий ҳаракатлари фонида санкцияларнинг иккинчи пакетини эълон қилди. Унга кўра, янги чекловлар Россия банк бозори ва муҳим давлат компанияларининг 70 фоизига таъсир қилади, нефтни қайта ишлаш заводларини модернизация қилишни ва самолёт қисмларини етказиб беришни тўхтатади.
