Тошкент шаҳридаги Inha университети битирувчи Муҳаммаджон Тошпулатов, Google Gmail’да (Канада) Android-дастурчи лавозимига эга бўлди. Ахборот технологиялари ва коммуникацияларини ривожлантириш вазирлиги Муҳаммаджон Тошпулатов билан бўлиб ўтган суҳбатни эълон қилди.
Муҳаммаджон, айтингчи, Канадага қандай келганингиз тарихи ва у ерда қандай ўқув дастури ва қайси университетда ўқигансиз?
Тошкент шаҳридаги Inha университетини битиришга яқин қолганда магистратура босқичини чет давлатда ўқиш режаси пайдо бўлган. Университетни битирганимдан сўнг Ўзбекистонда ишлаб юрган пайтларимда Канада ва Австралия давлатларидаги бир нечта университетларга ҳужжат топширдим. Университетларга қабул қилинганимдан кейин Канададаги Dalhauzi университетини танладим. Бу университетни танлашимга асосий сабаб грант ютиш имконияти, тўлов контракт миқдори ҳамда ўқишни битиргандан сўнг ишлаш имкониятлари эди (Австралиядаги университетлар бир неча баробар қиммат бўлган). 2020 йил январь ойидан ўқишни бошладим.
Dalhauzi университетида Компьютер Инжиниринг (Master of Computer Science) дастури бўйича таълим олдим. Дастур икки йиллик бўлиб, бир йил учта давр (term) га бўлинган бўлади. Биринчи йилда талабалардан, асосан, йўналишга оид фанларни ўзлаштириш талаб қилинади. Иккинчи йилда бўлса, илмий ишда қатнашиб, тезис ёзиш ҳамда уни ҳимоя қилиш керак бўлади. Ўқиш давомида талабаларга ўзлари топган профессорлар (supervisor) йўл-йўриқ кўрсатиб боришади. Мен 2021 йил декабрь ойида тезисимни мувафаққиятли ҳимоя қилиб, ўқишни якунладим. Битирув маросими 2022 йил май ойида бўлиб ўтди.
Янги мамлакат ва янги университетга мослашиш қийин бўлганми?
Албатта, янги мамлакатга кўчиб борганда, аввалига бир неча ой қийинроқ кечади. Менга ҳам бошида қийинроқ бўлган, секин-аста у ердаги об-ҳаво ҳамда ҳаёт тарзига кўникиб олгандан кейин ҳаммаси осонлашди. Аввалига ўқишга тезда мослашиб кетдим. Лекин пандемия сабабли ўқишлар онлайн кўринишга ўтказилгандан кейин бу ҳам ўзига яраша қийинчиликлар келтириб чиқарди.
Биринчи босқични тугатишга яқин илмий ишларда қатнаша бошладим. Иккинчи босқични бошлашдан олдидан аввалига факультет томонидан юқори баҳолар учун бериладиган бир марталик грант, кейинчалик эса илмий иш учун ажратиладиган грантлар соҳиби бўлдим. Булар менга иккинчи йил учун тўлов-контракт пулини тўлиқ қоплашга етди.
Ўқишни тугатишимга яқин, Канададаги Microfocus компаниясида Mitacs Accelerate дастури асосида практика (internship)га қабул қилиндим. Бу дастур бўйича тўрт ой давомида Machine Learning ҳамда киберхавфсизлик йўналишларида илмий иш билан банд бўлдим. Практикани 2022 йил март ойида муваффақиятли тугатдим.
Бизга маълумки, сизга яқинда дунёга машҳур бўлган таниқли компаниядан таклиф келган. Танлов жараёни ҳақида гапириб берсангиз ва ҳозирги ишингиз ўзингизга ёқадими?
Ўқишни тугатганимдан сўнг, Microfocus компаниясида практика қилаётганимда аллақачон иш қидириш жараёнини бошлаб юборган эдим. Энг биринчи IT соҳасидаги катта компаниялардан бошлашга қарор қилдим. 2022 йил февраль ойида Google компаниясининг ваканциялар жойлаб бориладиган сайтида Дастурий Инженер (Software Engineer) бўйича ваканция борлигини кўрдим. Ўқиб кўрсам, мен барча талабларига тўғри келарканман, топширдим.
Бир ҳафта ичида менга Google’дан эмаил келди. Унда мени биринчи қўнғироққа таклиф қилишган эди. Интервью учун кунни белгиладим ва тайёрланишни бошлаб юбордим. Маълумот учун, интервью кўп босқичлардан иборат бўлиб, уларда асосан «Data Structures and Algorithms» ҳамда маълум йўналиш (Android, iOS, Front-end, Back-end) бўйича билимларни текширишади. Шундай қилиб, уч ой давомида бир нечта босқичлардан муваффақиятли ўтдим. Май ойида ва ниҳоят мен кутган «ёқимли» эмаил келди. У ерда менга расмий равишда иш (offer) таклиф қилинган эди: Google Gmail командасида Android йўналиши бўйича дастурчилик. Бу командани ўзим интервьюлардан бирида танлаганман. Шунингдек, команда менежери ҳам бунга розилик берган. Таклифни ўқиб кўриб, бир неча кун ичида керакли саволларимга жавоблар олганимдан кейин, ишни қабул қилдим.
Иш бошқа шаҳар — Вотерлу (Waterloo)да жойлашган.
Бу шаҳар ҳамда Китченер шаҳарлари ёнма-ён жойлашгани учун кўпинча бир-бири билан алмаштириб айтилади. Июнь ойида бу шаҳарга кўчиб ўтиб, 13 июнь куни расмий равишда ишни бошладим.
Google катта компания эканлигини билар эдим, лекин унинг қай даражада катта эканлигини иш бошлаганимдан сўнг тушуниб етдим. Ҳозир ҳам бу ерда билмаган нарсаларим жуда кўп, секин-секин ўрганяпман. Компанияда ишчилар учун зўр шароитлар яратиб берилган. Тиббий суғурта, гибрид иш кунлари, спорт комплекслари, икки ёки уч маҳал компаниянинг ўзида бепул овқатланиш, ишга келиш ҳамда ишдан кетиш учун транспорт ва ҳоказолар шулар жумласидандир.
Биздан талаб қилинадигани — барчага ҳурматли бўлиб, ўз ишимизни тўғри бажариш.
Тошкентдаги Inha университетини муваффақиятли битирганлардан бири сифатида ОТМнинг ҳозирги талабаларига қандай тилаклар ва маслаҳатлар бера оласиз?
Тошкент шаҳридаги Инҳа университетидан кўп етук кадрлар етишиб чиқаётганига шубҳам йўқ. Бу ҳақида ижтимоий тармоқлар ҳамда янгиликларда тез-тез эшитиб тураман.
Талабаларга ёки яқинда битирганларга қуйидаги маслаҳатларни берган бўлардим:
- Ўз олдингизга катта мақсадлар қўйиб, унга қараб тўхтамасдан интилинг. Энг асосийси, (секинлик билан бўлсада) билим олиш ва ўсиб бориш.
- Фақатгина катта ойлик топиш асосий мақсад бўлиб қолмасин. Ёки аллақачон катта ойлик топятган бўлсангиз, шу билан тўхтаб қолманг. Ҳозирги кунда дастурлаш соҳасида ҳар йили янги технологиялар чиқиб бормоқда. Шунинг учун ўзингизни доим ривожлантириб туринг.
- Баъзи талабалар дастурчиликнинг қайси йўналишини танлаш бўйича бир қарорга келолмай, бир кун Андроид, у қийинлик қилса, бошқа кун «Back-end»ни танлаб юрган бўлишлари мумкин. Менда ҳам бошида шундай бўлган. Шу ҳолатдаги талабаларга ўзларига қизиқ туюлган йўналишни танлаб, ўша йўналишда қийин бўлса ҳам, аста-секин ўрганиб боришни маслаҳат бераман. «Consistency is the key».
- Ўзингиз билган яхши нарсаларни, билимларни бошқаларгаям улашиб боринг.
Шу билан бирга, барча талабаларга келгусидаги ўқиш ва ишларида омад тилаб қоламан!
