Осиё тараққиёт банки (ОТБ) Россиянинг Украинага бостириб кириши натижасида Ўзбекистонда озиқ-овқат хавфсизлигини таъминлаш, аҳолининг ижтимоий ҳимояга муҳтож қатламини ижтимоий ҳимоя қилиш ва бандликни қўллаб-қувватлаш учун 500 миллион доллар миқдорида кредит ажратишни маъқуллади. Бу ҳақда банк матбуот хизмати хабар берди.

«Марказий Осиё пандемиядан халос бўлгач, минтақа урушнинг иқтисодий таъсирига дуч келди, бу эса айниқса аҳолининг заиф қатлами ҳаётини оғирлаштиради», – дейди ОТБнинг Марказий ва Ғарбий Осиё бўйича департаменти бош директори.

Шунингдек, ОТБ томонидан Ўзбекистон ҳукуматининг озиқ-овқат хавфсизлигини мустаҳкамлаш ва нархлар барқарорлигини таъминлаш, кам таъминланган оилалар, кексалар ва аҳолининг ижтимоий ҳимояга муҳтож бошқа қатламларига тўғридан-тўғри ижтимоий ёрдам кўрсатиш, шунингдек, ишсиз ва қайтаётган меҳнат мигрантларини қўллаб-қувватлашга қаратилган дастурига ҳам молиявий ёрдам ажратилади.

Бундан ташқари ОТБ мониторинг ва баҳолашни қўллаб-қувватлаш учун техник ёрдам кўрсатади, бу техник ёрдам учун махсус жамғарманинг 400 минг миқдоридаги гранти ҳисобидан молиялаштирилади.

«Ушбу дастур ҳукуматнинг инфляцияни фискал интервенция орқали оқилона чегараларда ушлаб туришга қаратилган саъй-ҳаракатларига ҳисса қўшади», – деди ОТБ давлат бошқаруви бош иқтисодчиси.

Аввалроқ ОТБ томонидан Оролбўйи ресурсларини бошқариш учун 150 млн доллар қарз ажратилиши ҳақида хабар қилинганди.