Президентнинг «‘Оролбўйи ҳавзасида сув ресурсларини иқлим ўзгаришига мос ҳолда бошқариш’ лойиҳасини Осиё тараққиёт банки иштирокида амалга ошириш чора тадбирлари тўғрисида»ги қарори билан Ўзбекистон ва Осиё тараққиёт банки ўртасида 2022 йил 24 июнда имзоланган битимга кўра, 25 йил муддатга, хусусан 5 йиллик имтиёзли давр билан 150 миллион АҚШ доллари миқдорида қарз ажратилиши назарда тутилган. Бу ҳақда «Norma.uz» хабар берди.

Лойиҳанинг умумий қиймати 194,9 миллион АҚШ долларини ташкил этади. Ўзбекистоннинг ҳиссаси эса 40,2 миллион АҚШ доллари эквивалентида бўлиб, шундан 26,6 миллион АҚШ доллари республика бюджети ҳисобидан ҚҚСни қоплаб бериш ва божхона божидан озод этиш шаклида бўлади. Осиё тараққиёт жамғармасидан 3 миллион АҚШ доллари, Осиё тараққиёт банкининг Юқори технологиялар жамғармасидан 0,3 миллион АҚШ доллари ажратилади, фермер хўжаликлари улуши эса 1,38 миллион АҚШ долларини ташкил қилади.

Таъкидланишича, лойиҳани амалга ошириш даврида (7 йил – 2022-2029 йиллар) «вақтинча олиб кириш» божхона режимига расмийлаштирилган махсус техникалар божхона божлари ва солиқ тўловларидан шартли равишда озод этилади. Лойиҳа Қорақалпоғистон Республикаси, Бухоро, Сурхондарё ва Хоразм вилоятларида амалга оширилиши режалаштирилган. Сув хўжалиги вазирлиги – лойиҳани амалга ошириш, қарз ва грант маблағларидан самаралили фойдаланиш ҳамда  барча белгиланган натижаларга эришилишини таъминлаш юзасидан масъул ижро этувчи орган ҳисобланади. Шунингдек, лойиҳани бошқариш ва мувофиқлаштириш функциялари мазкур вазирлик ҳузуридаги хорижий инвестиция лойиҳаларини амалга ошириш марказига юкланди.

Хабарда келтирилишича, Осиё тараққиёт банкининг қарзини сўндириш ҳамда фоиз, қарз бўйича комиссия ва бошқа тўловлар билан боғлиқ харажатлар Ўзбекистоннинг Республика бюджети ҳисобидан амалга оширилади.

Шунингдек, ҳужжат билан қуйидагилар тасдиқланди:

• «Оролбўйи ҳавзасида сув ресурсларини иқлим ўзгаришига мос ҳолда бошқариш»лойиҳасининг асосий техник-иқтисодий кўрсаткичлари, шунингдек «Жондор» ва «Боботоғ» сублойиҳаси бўйича;
• «Оролбўйи ҳавзасида сув ресурсларини иқлим ўзгаришига мос ҳолда бошқариш» лойиҳаси учун Осиё тараққиёт банкидан жалб этиладиган қарз бўйича асосий қарзни қайтариш ва фоизлар тўлашнинг прогноз жадвали.