«Тараққиёт стратегияси» маркази 2023 йилги давлат дастурига оид Президент фармони лойиҳасини жамоатчилик муҳокамаси учун эълон қилди. Унга кўра, 2023 йил 1 мартдан бошлаб тадбиркорлик субъектларига нисбатан янги турдаги жавобгарлик ва жазо чораларини жорий этишга бир йиллик мораторий ўрнатилади.

Маълум қилинишича, Адлия вазирлиги Бош прокуратура билан биргаликда бир ой муддатда қуйидагиларни назарда тутувчи қонун лойиҳасини ишлаб чиқади:

• савдо ёки хизмат кўрсатиш қоидаларини бузганлик учун жиноий жавобгарликни маъмурий юрисдикцияга ўтказиш орқали бекор қилиш;
• тадбиркорлик фаолиятини амалга оширишда биринчи марта ҳуқуқбузарлик содир этган кичик тадбиркорлик субъектларига молиявий санкцияларни қўллаш тақиқлаш (жиноят ишлари доирасида аниқланган ва кўриб чиқилаётган ҳуқуқбузарлик ишлари бундан мустасно).

Бунинг натижасида тадбиркорлик фаолияти билан боғлиқ жазо чоралари
либераллаштирилади.

Аввалроқ Президент фармони лойиҳасига кўра, 2023 йилда 26 минг нафар фуқарога бозор тамойилларига асосланган ипотека кредитлари, шунингдек, 11 минг нафар фуқарога бошланғич бадал ва фоиз тўловларининг бир қисмини қоплашга 1 трлн сўм миқдорда субсидия ажратилиши ҳақида хабар берилганди.