Американинг SpaceX компанияси Украина Қуролли Кучлари ҳарбий хизматчилари учувчисиз қурилмаларни бошқариш учун Starlink сунъий йўлдош интернетидан фойдалана олмаслиги учун чоралар кўрди. Бу ҳақда SpaceX президенти Гвинн Шотвелл маълум қилди, деб хабар беради Reuters.

«Компаниянинг Украина ҳукумати билан тузган шартномасига кўра, Starlink алоқаларидан банклар, шифохоналар ва тинч аҳолини интернет билан таъминлаш каби гуманитар мақсадларда фойдаланиш керак», деди Шотвелл.

У, шунингдек, Украина ҳарбий хизматчилари Starlink терминалларидан, жумладан, дронларни бошқаришда фойдаланаётгани ҳақидаги хабарларга муносабат билдириб, Starlink ҳеч қачон қурол сифатида фойдаланиш учун мўлжалланмаганини айтди.

«Биз уларнинг имкониятини чеклаш учун қила олишимиз мумкин бўлган нарсалар бор [Starlink’дан дронларда фойдаланиш]. Биз қила оладиган ишлар бор ва биз уларни аллақачон бажариб бўлганмиз», —деди Шотвелл.

«Биз биламизки, [Украина] ҳарбийлари улардан [Starlink терминаллари] алоқа воситаси сифатида фойдаланмоқдалар ва бу нормал ҳолат. Лекин биз улардан тажовузкор мақсадларда фойдаланишларини истамаймиз», — дея қўшимча қилди SpaceX раҳбари.

Эслатиб ўтамиз, Украина рақамли трансформациялар вазири Михаил Фёдоров январь ойининг ўрталарида мамлакат аллақачон 30 мингта Starlink терминалини олганини маълум қилганди.