Ўзбекистон Малайзияда ипакчилик бўйича қўшма корхона ташкил этади
«Ўзбекипаксаноат» уюшмаси ва MACITA вакиллари ўртасида онлайн-мулоқот ўтказилди. Унда томонлар ўртасида Ўзбекистондан ипак қурти уруғини экспорт қилиш ва Малайзияда ипакчилик бўйича қўшма корхона ташкил этиш имкониятларини кўриб чиқиш бўйича келишувга эришилди
Ўзбекистоннинг Малайзияядаги элчихонаси кўмагида «Ўзбекипаксаноат» уюшмаси ва Малайзия—Хитой халқаро савдо ассоциацияси (MACITA) вакиллари ўртасида онлайн-мулоқот ўтказилди. Бу ҳақда «Дунё» АА хабар берди.
Маълум қилинишича, мазкур тадбирда томонлар ўртасида ипакчилик соҳасида қўшма инвестиция лойиҳасини ишлаб чиқиш ва ипак қурти, шунингдек, турли ипак маҳсулотларини Ўзбекистондан Малайзияга экспорт қилиш масалаларига алоҳида эътибор қаратилган.
Малайзия вакиллари «Ўзбекипаксаноат» уюшмаси ва унинг таркибидаги корхоналар билан ҳамкорликни ривожлантиришдан манфаатдор эканини, мамлакатда ипакчилик соҳасида тўпланган улкан тажриба ҳамкорлик муҳим аҳамиятга эгалигини таъкидлади.
Шунингдек, музокаралар натижасида томонлар ўртасида Ўзбекистондан ипак қурти уруғини экспорт қилиш ва Малайзияда ипакчилик бўйича қўшма корхона ташкил этиш имкониятларини кўриб чиқиш бўйича келишувга эришилди.
Маълумот учун, MACITA 2011 йилда ташкил этилган. Ташкилотнинг асосий вазифаси Малайзия ишлаб чиқарувчиларининг маҳсулотлар ва хизматларини Хитой ҳамда бошқа давлатларга экспорт ва импорт қилишда кўмаклашишдан иборат. Ассоциация Малайзия Халқаро савдо ва саноат вазирлиги, шунингдек, бошқа ҳукумат ташкилотлари билан ҳамкорликда фаолият юритади.
