Президентнинг 2022 йил 27 апрелдаги қарори билан ипакчилик ва қоракўлчилик соҳасига тақдим этилган айрим солиқ имтиёзлари муддатларини узайтириш белгиланди.

Хусусан, ипак қурти уруғи, тут кўчатлари ва пилла етиштириш, пиллани қайта ишлаш ва тайёр маҳсулотлар ишлаб чиқариш билан шуғулланувчи юридик шахсларни мол-мулк ва ер солиғидан озод этиш имтиёзи 2023 йил 1 январдан 2026 йил 1 январга қадар узайтирилади.

Мазкур имтиёз 2018 йил 4 декабрдаги Президент қарори билан 2023 йил 1 январгача тақдим этилган эди.

Қоракўлчилик маҳсулотлари ишлаб чиқарувчилари учун ер солиғи ставкасини 2018 йилда белгиланган миқдорда сақлаб қолиш муддати 2026 йил 1 январгача узайтирилади.

Ушбу преференция 2018 йил 14 мартдаги Президент қарори билан 2023 йил 1 январгача белгиланган эди.

Қарорда мазкур ўзгаришлардан келиб чиқиб Солиқ кодексига киритиладиган ўзгартириш ва қўшимчалар бўйича қонун лойиҳаси Вазирлар Маҳкамаси томонидан Олий Мажлис Қонунчилик палатасига киритиш белгиланган.

Аввалроқ тадбиркорлар учун солиқ маъмурчилиги ва текширишлар тизими соддалаштирилиши маълум қилинганди.