«O‘zbekiston korxonalari JST talablariga javob bera oladi»- Jahongir Ortiqxo‘jayev
Jahongir Ortiqxo‘jayev, O‘zbekistonning Jahon savdo tashkilotiga a’zo bo‘lishi mamlakat iqtisodiyoti uchun yangi imkoniyatlar yaratishini ta’kidladi. Tadbirkor, JSTga qo‘shilish mahalliy ishlab chiqaruvchilarga zarar qilishi mumkin degan xavotirlarni noo‘rin ekanini aytdi.
Tadbirkor Jahongir Ortiqxo‘jayev, O‘zbekistonning Jahon savdo tashkilotiga (JST) a’zo bo‘lishi mamlakat uchun yangi imkoniyatlar yaratishini ta’kidladi. U 29-noyabr kuni «Toshkent yoshlarni sevadi» oyligi doirasida o‘tkazilgan yoshlar tadbirkorligi yo‘nalishidagi ochiq muloqotda, JSTga qo‘shilish mahalliy ishlab chiqaruvchilarga salbiy ta’sir o‘tkazmaydi, balki xorijga eksportni oshirish imkoniyatlarini yaratadi, dedi.
Ortiqxo‘jayev JSTga qo‘shilish mahalliy bozorga zarar yetkazishi mumkin degan prognozlarni «noo‘rin qo‘rquv» deb atadi. «Masalan, tashkilotga a’zo davlat — AQShga yangi rahbar Tramp kelyapti. U Meksika bilan Kanadaga bojni 25 foizga, Xitoyga 10 foizga oshirmoqchi. Bu esa JST qoidalariga ziddir. Ya’ni, bitta rahbar almashishi bilan savdo tashkiloti qonun-qoidalarini o‘zgartirishning imkoni yo‘q», deydi Ortiqxo‘jayev.
Shuningdek, tadbirkor, JSTga qo‘shilish O‘zbekistonda ishlab chiqarilgan mahsulotlarni xorijga eksport qilish imkoniyatlarini kengaytirishini va bu jarayonda sifatning oshishini ta’kidladi. «Biz importdan emas, bizga ochilayotgan boshqa davlatlarga xursand bo‘lishimiz kerak. Ya’ni, bizning mahsulotlarimizni boshqa davlatlarga ham sotish imkoniyati ko‘payadi. Tanganing ikkinchi tomoni bor. Hamma biz yutqazamiz, deb o‘ylashi mumkin, lekin yutadigan joylarimiz ham ko‘p. Va faqat sifat oshadi, xalqqa va davlatga foyda keltiradi», dedi u.
Ortiqxo‘jayev, O‘zbekistonning ko‘pgina korxonalari JSTning har qanday talablariga javob bera oladigan mahsulot ishlab chiqarish imkoniyatiga ega ekanini ta’kidladi. «Katta bir zarar yoki qo‘rqinchli hodisa yuz beradi deb o‘ylamayman», dedi tadbirkor.
Noyabr oyi boshida O‘zbekiston AQSh bilan Jahon savdo tashkilotiga a’zo bo‘lish bo‘yicha ikki tomonlama muzokaralarni yakunlagan edi. Shu bilan birga, Qo‘shma Shtatlar O‘zbekiston bilan bu muzokaralarni yakunlagan 21-davlat bo‘ldi. 29-noyabr kuni esa Xitoy bilan ikki tomonlama muzokaralar yakunlangan. Prezidentning JST masalalari bo‘yicha maxsus vakili Azizbek Urunov «22 ta mamlakat bilan muzokaralar tugadi, ko‘p qolmadi», deya ta’kidladi. 2-dekabr kuni Filippin bilan Jahon savdo tashkilotiga a’zo bo‘lish bo‘yicha ikki tomonlama muzokaralar o‘z nihoyasiga yetdi.
