«Фақат 10 дақиқадан 2 соатгача қисқа узилишлар бўлмоқда». Энергетика вазирлиги электр таъминоти яхшиланганини маълум қилди
Ўзбекистонда 10 дақиқадан 2 соатгача бўлган қисқа муддатли узилишлар учраётгани маълум қилинган
Ўзбекистон Энергетика вазирлиги электр энергияси таъминотининг сезиларли даражада яхшилангани юзасидан баёнот берди. Баёнот вазирлик веб-сайтида эълон қилинди.
Маълум қилинишича, Ўзбекистонда электр таъминотида қисқа муддатли узилишлар ҳали ҳам учраб турибди. Бироқ кўп ҳолларда, бу 10 дақиқадан 2 соатгача бўлган қисқа муддатли узилишларни ташкил қилади.
«Бироқ, шуни ҳам эсда тутиш керакки, яқин ўтмишда барчамиз ‘оммавий ўчириш’ ҳолатига дуч келар эдик. Аслида, бу энергия сарфини тежаш учун маълум бир жадвалга мувофиқ амалга оширилган узилишлар эди. Фақатгина 5 йил олдин тугатилган ‘оммавий ўчиришлар’нинг сабаби эса оддий. Йиллар давомида электр энергияси истеъмоли ўсишига қарамай, бир хил энергия баланси шаклланган ва мавжуд балансни тенг тақсимлаш мақсадида деярли ҳар куни 6 ёки ундан кўпроқ соатга электр энергия таъминотида узилишлар рўй берган. Масалан, ўша йилларда Қашқадарё вилоятида ана шундай режали ўчиришлар кунига 18 соатгача етган. Аҳолининг сўзларига кўра, ўша вақтларда эрталаб ва кечқурун фақат 2-3 соат электр энергияси берилган холос», дейилади вазирлик баёнотида.
Вазирлик баёнотига кўра, шунга қарамай, 25 йил давомидаги маълумотларга кўра, мамлакатда электр энергияси истеъмоли бор йўғи 20 фоизга ўсган. Сўнгги 5 йил ичида электр энергияси истеъмолининг ўсиши йиллик 11 фоизни ташкил қилган.
Қайд этилишича, сўнгги 5 йил давомида энергия баланси аҳолининг реал эҳтиёжларидан келиб чиққан ҳолда шакллантирилган. Натижада кунлик узоқ муддатли ўчиришларга барҳам берилган, маълум сабабларга кўра юзага келаётган қисқа муддатли электр таъминотидаги узилишлар эса тун-у кун ишлайдиган аварияга қарши махсус бригадалар томонидан зудлик билан бартараф этиб борилаётгани таъкидланган.
Баёнотда ёзилишича, бу каби узилишларнинг бир неча йил аввал Самарқанд, Бухоро, Урганч ва республиканинг бошқа ҳудудларида деярли ҳар куни 4–6 соат давомида электр таъминотисиз қолган ўтмиши билан алоқаси йўқ. Республикада энергетика соҳасида сўнгги йилларда амалга оширилаётган ислоҳотлар, истиқболли лойиҳалар электр энергиясини ишлаб чиқариш ҳажми нафақат анъанавий иссиқлик электр станциялари ҳисобидан, балки қуёш ва шамол электр станциялари орқали ҳам ошириб борилаётгани қайд этилган.
Маълум қилинишича, 1991–2016 йилларда, ёки 25 йил ичида, республика бўйича 9300 километр электр узатиш тармоқлари ва 4800 та трансформаторлар янгиланган. Шу билан бирга, 2017–2021 йиллар давомида 40 минг 600 километр бўлган электр узатиш тармоқлари ва 12 минг 900 та трансформаторлар янгиланмоқда. 4600 мегаваттдан зиёд янги қувватлар ишга туширилмоқда.
Аввалроқ Ўзбекистонда электр таъминотига салбий таъсир қилаётган омиллар очиқлангани хабар қилинганди. Шунингдек, Ўзбекистондаги ГЭСларда сув танқислиги сабаб электр токи ишлаб чиқариш ҳажми камайгани ҳақида хабар берилди.