Кўпчилик барча учрашувларга улгуришга, барча хабарларга жавоб беришга ва ҳамма лойиҳаларни белгиланган муддатдан олдин ёпишга ҳаракат қилади. Бундай тиғиз жадвал билан шахсий ривожланиш учун қандай қилиб вақт топиш мумкин?

Дьюк университети ўқитувчиси ва маркетинг стратеги Дори Кларк CNBC телеканалига берган интервьюсида ушбу масаланинг ечими билан ўртоқлашди. Профессорнинг сўзларига кўра, «20 фоиз қоидаси» деб номланган усул Google компаниясида машҳур.

2004 йилда Google энди биржа савдоларига чиққанида компания асосчилари Сергей Брин ва Ларри Пейж акциядорларга хат ёзган. Улар хатда ўз ходимларини вақтларининг 20 фоизини шахсий ривожланиш учун сарфлашини рағбатлантиришини маълум қилган. Брин ва Пейж бу орқали ходимлар яхши ишлайди ва компанияга кўпроқ даромад келтиради деб ҳисоблаган.

«Бу уларга ижодкорлик ва инновацион ғоялар яратиш имконини беради. Бизнинг кўплаб ютуқларимиз (масалан, AdSense ва Google News) шу йўл билан юзага келди», дейилганди хатда. Қуйида «20 фоиз қоидаси» ҳақида сўз боради.

1. Нимани ўрганмоқчи эканлигингизни аниқ қилиб олинг

Қандай кўникма ёки билимга эга бўлишни хоҳлаётганингизни ўйлаб кўринг. 10 хил фан ёки йўналиш бўйича 10 та курс ўрнига, биттасини танлаш яхшироқдир. Шунда аниқ бир соҳанинг аниқ бир йўналишида профессионалга айланасиз. Олинган маҳорат иш берувчининг назарида сизнинг аҳамиятингизни ошириши ва қўшимча даромад келтириши мумкин.

2. Янги кўникманинг минимал фойдасини аниқ белгилаб олинг

Бу вақтингизнинг 20 фоизи бекор кетмаслигининг кафолати бўлади. Янги кўникма моддий фойда келтирмаса ҳам сиз учун бошқа томондан фойдали бўлиши мумкинлигини унутманг.

3. Мослашувчан бўлинг

Вақтнинг 20 фоизини шахсий ривожланиш учун тартиб-интизом билан сарфлаш яхши. Лекин режалаштирилмаган иш ёки вазифалар чиқиб қолса, шахсий ривожланиш вақтини ўзгартирса, сал ортга сурса ҳам бўлади. Бунинг зарари йўқ. Муҳими — ташлаб қўймаслик.

4. Шахсий ривожланишни қизиқарли жараёнга айлантиринг

Вақтингизнинг бир қисмини янги кўникмаларни эгаллашга сарфлаш истаги чексиз уй вазифалари ёки доимий равишда қийин машқларни бажариш ортидан сўниб қолиши мумкин.

Янги кўникмага эга бўлиш баъзан қийин ва зерикарли жараёнга айланади ва кучли ирода талаб қилади. Агар сиз фақат қийинчиликка дуч келсангиз, зерикишингиз, умидсизликка тушишингиз ва охир-оқибат таслим бўлишингиз мумкин.

Ушбу 20 фоиз вақтни янада ёқимли қилишнинг кўплаб усуллари мавжуд. Мисол учун, хонага бекиниб, китоб ўқиш ўрнига вақти-вақти билан сайр қилиб, аудиокитоб тинглашингиз мумкин. Зерикарли кўринган курсларга ёлғиз эмас, балки дўстингиз билан қатнашишингиз мумкин.

5. Натижани келажакдан изланг

Бошланишида кичик ва маъносиз кўринган ҳаракатлар келажакда сиз ва рақибларингиз ўртасида катта фарқни яратиши мумкин. Вақтингизнинг 20 фоизини ажратиб, ҳар куни кам-камдан ўз устингизда ишлашингиз келажакда катта имкониятлар бериши мумкин.

Аввалроқ иш берувчининг таклифини қандай қилиб «чиройли» рад этиш мумкинлиги ҳақида батафсил маълумот берилганди.