Агар ходим потенциал иш берувчининг таклифини рад этмоқчи бўлса, компаниянинг камчиликларини эмас, балки хушмуомалалик билан муаммо ўзидалигини айтгани маъқул. Бундан ташқари, ҳатто хушмуомалалик билан берилган рад жавоби ҳам аниқ фактларга асосланиши керак.

Таклифни олишдан олдин ходим тўғридан-тўғри суҳбатнинг ўзида ишдан бош тортиши мумкин. Рад жавобини «вақт ажратиб, интервьюга таклиф қилганингиз учун миннатдорлик билдираман», деб бошлаш керак. Шунингдек, юклатилаётган вазифалар сизни қизиқтирмаслигини ёки иш ҳақи шартларидан қониқмаганингизни очиқ айтганингиз маъқул.

Агар рад жавобини бизнес эгаси, акциядори ёки бевосита бошқарувчиси билан суҳбатда маълум қилишга тўғри келса, у ҳолда тўғридан-тўғри мақсадга ўтиб, қарорингизни сабаблари билан қисқа ва лўнда тушунтириб берсангиз, тўғри бўлади. Чунки бундай одамлар ўз вақтларини жуда қадрлайди ва салбий бўлса ҳам, тезкор қарорларни яхши кўради.

Якунда рад жавоби янграса-да, самимий ва очиқ суҳбат баъзи ҳолларда бизнес эгаси ёки иш берувчи билан яхши алоқалар ўрнатишга ҳамда бўлажак ҳамкорлик муносабатларига йўл очади.

Шундай ҳолатлар бўладики, рад жавобини эшитган иш берувчи шахсиятга ўтиши, салбий реакция кўрсатиши ҳам мумкин. Ҳаттоки, ўша иш берувчи кейинчалик ўзининг доирасида сиз ҳақингизда салбий гап-сўз қилиши эҳтимоли ҳам йўқ эмас. Бундай ҳолатларга эътибор қилмаган маъқул. Асабийлашиш эса умуман ярамайди.

Умумий таниш ёки касбдошлардан кимдир ўша воқеага аниқлик киритмоқчи бўлганида иш берувчи билан атиги бир марта ўша интерьвюда кўришганингиз ва у ҳақида салбий ёки ижобий фикр билдиришга қийналишингизни айтиб, суҳбат аслида қандай кечганига ойдинлик киритсангиз зиён қилмайди.

Аввалроқ қандай қилиб янги ходим компания муаммоларини ҳал қилиши мумкинлиги ҳақида батафсил маълумот берилганди.