Facebook собиқ ходими Френсис Хаугеннинг компаниядаги тартиб ва маҳсулотларнинг эҳтимолий зарарини фош қилувчи кўрсатмаларини ижтимоий тармоққа қарши уюштирилган кампания сифатида кўрсатишга ҳаракат қилди. Бу ҳақда The Wall Street Journal (WSJ) газетаси манбаларига таяниб хабар берди.

Ҳауген 2021 йил октябрь ойида барча ижтимоий тармоқлар ва Facebook’ни тартибга солишни кучайтириш муҳокама қилинган АҚШ Конгрессидаги тингловда сўзга чиққанди. Facebook эса ўшанда бунинг олдини олишга ҳаракат қилган.

WSJ’нинг қайд этишича, Facebook Конгрессда унга қарши партиялараро коалиция тузилишига йўл қўймаслик учун «сувни лойқалаган».

Нашр манбаларига кўра, республикачилар орасида компания Хауген демократларга ёрдам берганини айтган, демократ доираларда эса танқидлар тўлқинини республикачиларнинг қасоси деб атаган.

«Вазиятни биринчи навбатда сиёсий деб кўрсатишга уриниш Facebook’нинг умумий ҳаракатлар режасининг бир қисми бўлиб, уни шахсан компаниянинг бош директори Марк Цукерберг қўллаб-қувватлаган», дейди WSJ суҳбатдошлари.

Маълум қилинишича, Цукерберг компания ходимларига узр сўрамасликни айтган. Ўтмишдаги инқирозлардан фарқли ўлароқ, Цукерберг хатоларни шахсан тан олиб, уларни тузатиш билан шуғулланиш ўрнига, бу сафар изоҳ беришдан ва ҳатто Конгрессда кўрсатма беришдан қочган. Унинг ўрнига тингловларда тадбиркорнинг ўринбосарлари иштирок этган.

«Агар ишимиз нотўғри кўрсатилса, кечирим сўрамаймиз. Биз ўз позициямизни ҳимоя қиламиз», — дейди Facebook вакили Энди Стоун нашрга.

Қайд этилишича, ижтимоий тармоқ ички тадқиқотларни ташкил этишдаги ўзгаришларни тан олган, унинг маҳсулотлари одамларга қандай таъсир қилаётганини кўпроқ ўрганишга ваъда берган ва ўз фойдаланувчилари хавфсизлигини ҳимоя қилиш учун миллиардлаб доллар сармоя киритаётганини таъкидлаган.

Facebook ҳақида терговлар чоп этилгандан бери бир қанча юқори мартабали раҳбарлар компанияни тарк этган ёки кетиш ҳақида эълон қилган.

Маълумот учун, Facebook’нинг собиқ ходими Хауген октябрь бошида Конгрессда нутқ сўзлаб, компанияни даромадни фойдаланувчилар хавфсизлигидан устун қўйишда айблаганди. Унинг сўзларига кўра, Facebook фойдаланувчиларнинг жисмоний ва руҳий саломатлигига зарарни камайтиришдан кўра лайклар ва репостларни кўпайтириш муҳимроқ деб ҳисоблайди.

Хауген ўшанда конгрессменлар ва оммавий ахборот воситаларига компаниянинг ички ҳужжатлари архивини топширганди. Цукерберг Ҳаугеннинг айбловларини рад этиб, уларнинг мантиққа тўғри келмаслигига эътибор қаратганди. Шунингдек, тадбиркор Facebook зарарли контентга қарши курашиш учун бошқа компанияларга қараганда кўпроқ одам ишлаётганини айтган.

Аввалроқ Meta Facebook’нинг 50 минг фойдаланувчиси кузатилгани ҳақида хабар берганди.