Apple бош директори Тим Кук 2021 йилда қарийб 100 миллион доллар ишлаб топди. Ушбу маълумот компаниянинг АҚШ Қимматли қоғозлар ва биржа комиссиясига (SEC) юборилган ҳисоботида келтирилган.

Ҳужжатга кўра, Кукнинг йиллик маоши 3 миллион долларни ташкил этган, у яна 82,3 миллион долларни компания акциялари кўринишида олган. Кук, шунингдек, Apple’нинг молиявий ва экологик мақсадларга эришгани учун 12 миллион доллар бонус олди. Компания раҳбарининг жами топган пули 2021 йилда 98,7 миллион доллардан ортиқни ташкил қилди.

Кук Apple ходимларининг ўртача маошидан 1447 баравар кўп маош олган.Маълумотларга кўра, ходимларнинг ўртача маоши 68 254 долларга тенг. Ҳисоботда, шунингдек, Apple ўз бош директорининг шахсий рейслари учун 712 минг доллардан ортиқ маблағ сарфлагани кўрсатилган.

Ҳужжатда айтилишича, Кук 2017 йилдан бери самарадорлик ва хавфсизлик нуқтаи назаридан режали тижорат рейсларини тўхтатган. Кук Apple компаниясининг асосчиси Стив Жобсдан кейин бош директор лавозимини эгаллаганига 2021 йилда 10 йил тўлди.

«Бу йил Apple учун ажойиб ўн йил бўлди. Кук 2021 йил бош директор этиб тайинланганидан бери биринчи марта акциялар кўринишида мукофотланди», дейилади ҳисоботда.

Forbes Real-Time рейтингига кўра, Тим Кукнинг бойлиги 1,5 миллиард долларни ташкил қилади.

Аввалроқ Apple бош директори Тим Кук 2016 йилда Пекинга қилган биринчи шахсий ташрифлари чоғида расмийлар билан беш йиллик яширин келишувга эришгани маълум бўлганди.