АҚШда Clearview AI компанияси ер юзидаги деярли барча инсонларни кузатиш имконини берувчи тизим яратди. Бу ҳақда The Washington Post хабар берди.

Маълум қилинишича, Clearview AI 100 миллиард инсон фотосуратларидан иборат дунёдаги энг катта маълумотлар базасини яратишга ёрдам берадиган инвесторларни қидирмоқда. Бу Ер юзидаги деярли ҳар бир одамнинг юзини аниқлаш учун кифоя қилади.

Clearview аллақачон 10 миллиардга яқин расм тўплаганини ва ҳар ой 1,5 миллиард қўшаётганини айтган. Ғояни амалга ошириш учун инвесторлардан яна 50 миллион доллар керак бўлади.

Clearview суратларни ижтимоий тармоқлардан ва бошқа интернет манбаларидан уларнинг эгаларига ҳам, суратлар жойлаштирилган сайтларга ҳам хабар бермасдан олади. Facebook, Google, Twitter ва YouTube аллақачон компаниядан сурат йиғишни тўхтатишни талаб қилган. Бироқ Clearview АҚШ Конституцияси унга шундай ҳуқуқ берганини айтиб, рад этган.

Бундан ташқари, Clearview ўз бизнес моделини кенгайтириш, янги майдонларга чиқиш ҳамда юришни идентификациялаш, фотосуратлар жойлашуви ва бармоқ изини масофадан сканерлаш каби янги технологияларни ўрганиш ниятида.

Clearview компанияси маълумотларни Google билан бир хил тарзда тўплашини ва унинг материаллари жиноятнинг олдини олиш ҳамда унга қарши курашиш учун фойдаланилишини айтган. Ҳозирча компания нодавлат нотижорат ташкилотлар ва компанияларга хизмат кўрсатиш-кўрсатмаслик тўғрисида бир қарорга келмаган — маълумотларни фақат давлат идоралари олмоқда.

Технология ҳаётни сақлаб қолиши, бегуноҳларни ноҳақ айбловлардан ҳимоя қилиши ва умуман нотўғри идентификациянинг олдини олиши айтилмоқда.

Маълум бўлишича, полиция аллақачон Clearview базасидан АҚШдаги тартибсизликлар пайтида зўравонлик билан жиноят содир этган ёки ўзгаларнинг мулкини йўқ қилишда гумон қилинганларни қидириш ва ҳибсга олиш учун фойдаланган. 2021 йилнинг 6 январида Вашингтонда содир бўлган воқеалардан сўнг Clearview AI ўз технологиясидан Капитолийни эгаллаб олган шахсларни аниқлашда фойдаланилгани ҳақида хабар берган.

Бироқ, Clearview’га қарши кўплаб даъволар аллақачон қўзғатилган. Хусусан, Иллинойс штатида компания маҳаллий аҳолининг розилигисиз уларнинг суратларини ноқонуний йиғишда айбланмоқда. Федерал суд адвокатларнинг тузатишга доир далилларини рад этган ва даъво давом этиши керак деган қарорга келган.

Шунингдек, Airbnb, Lyft ва Uber аллақачон Clearview технологиясига «қизиқиш билдирган» деган миш-мишлар тарқалган, чунки кўплаб жиноятлар уларнинг платформаларидан фойдаланиш билан боғлиқ. Бироқ компания раҳбари ва шериклари ҳамкорлик режаларини рад этмоқда.

Аввалроқ АҚШда электромобилларни ҳаракат пайтида қувватлайдиган йўл қурилиши хабар қилинганди. Шунингдек, Meta фойдаланувчининг кўз ҳаракати ва юз ифодасини кузатиш технологиясини ишлаб чиқиши ҳақида хабар берилди.