Уоррен Баффет Occidental Petroleum нефть компаниясининг 5,1 млрд долларлик акцияларини сотиб олди
Хариддан сўнг компания акциялари нархи 18 фоизга ўсди.
Уоррен Баффетнинг Berkshire Hathaway компанияси Occidental Petroleum нефть гигантининг 91,2 миллион оддий акциясини сотиб олди, уларнинг қиймати 5,1 миллиард долларга баҳоланмоқда. Бу ҳақда АҚШ Қимматли қоғозлар ва биржа комиссияси (SEC) маълумотларига таяниб CNBC хабар берди.
Occidental Petroleum’нинг 61 миллиондан ортиқ акциялари 2–5 март кунлари ҳар бир акция учун 47,07 дан 56,45 долларгача бўлган нархларда сотиб олинди. Қолган 29 миллиони ҳам 2022 йил сотиб олинган.
Таъкидланишича, акциялар қачон сотиб олингани аниқ эмас, чунки Berkshire янги харидлар ҳақида маълумотни улар амалга оширилганидан кейин бир кун ичида ошкор қилишни талаб қиладиган 10 фоизлик эгалик мақомига етмаган. Баффет компанияси оддий акцияларнинг 9 фоизига эгалик қилмоқда.
Шунингдек, Berkshire яна 83,9 миллион дона акцияни 59,62 долларга сотиб олиш учун ордерга эга. Гарчи ушбу кафолатлар SEC’га ариза бериш учун ишлатилмаган бўлса-да, улар эътиборга олиниши керак. Бу шуни англатадики, техник жиҳатдан Berkshire’нинг улуши 17 фоиздан ошади.
Berkshire Anadarko компаниясини 38 миллиард долларга сотиб олишга ёрдам бериш учун 2019 йилда Occidental компаниясига 10 миллиард долларлик кредитни ўз ичига олган битимни тузганида ушбу ордерларни олганди.
Пулни тежаш учун Occidental биринчи ва иккинчи чоракларда акциялар шаклида Berkshire кредити бўйича тўловларни амалга оширди. Berkshire биринчи чоракда 17,3 миллион дона, иккинчи чоракда эса 11,6 миллион дона акция сотиб олди.
Occidental Petroleum — Арманд Ҳаммер томонидан асос солинган ва штаб-квартираси Лос-Анжелесда жойлашган Америка нефть компанияси. Айни пайтда компания Fortune Global 500 рейтингида 491-ўринни эгаллаб турибди. 4 март куни компания акциялари NYSE платформасида 17,6 фоизга, яъни 56,15 долларгача кўтарилди, 2022 йилда эса уларнинг қиймати деярли икки бараварга ошди.
Аввалроқ Ғарбнинг йирик нефть компаниялари 41 миллиард долларлик акцияларни қайта сотиб олиши хабар қилинганди. Шунингдек, Уоррен Баффет миллиардерлар рейтингида Meta ва Google асосчиларидан ўзиб кетгани ҳақида хабар берилди.
