Ғарбнинг йирик нефть компаниялари 41 миллиард долларлик акцияларни қайта сотиб олишни режалаштирмоқда. Бу ҳақда RBC Capital Markets банки таҳлилчиларининг ҳисоб-китобларига таяниб Financial Times хабар берди.

Маълум қилинишича, Ғарбнинг еттита йирик нефть ва газ компаниялари — BP, Shell, ExxonMobil, Chevron, TotalEnergies, Eni ва Equinor 2022 йил ўз акцияларини жами 41 миллиард долларга қайта сотиб олишни режалаштирмоқда.

Қайд этилишича, Bernstein Research инвестиция компанияси умумий суммани бироз пастроқ — 38 миллиард долларга баҳоламоқда. Аммо, ҳар ҳолда, бу 2008 йилдан бери рекорд миқдор бўлади. Ўшанда компаниялар ўз акцияларини 46 миллиард долларга қайтариб сотиб олганди.

Таъкидланишича, Shell 2022 йилда акцияларни сотиб олишга энг кўп маблағ сарфлайди — 12 миллиард доллар. BP иккинчи ўринда — тахминан 6,5 миллиард долларга сотиб олади. Қолган компаниялар бунинг учун 2 миллиард доллардан 6 миллиард долларгача маблағ ажратади.

Таҳлилчилар нефть ва газ компанияларининг бундай режаларини яхши бозор атмосфераси ва акциядорлар ишончини қозониш истаги билан изоҳлайди.

«Сектор узоқ вақтдан бери яхши ҳолатда. Энди асосий савол — бу циклнинг давомийлиги», — деган Бирай Борхатариа, RBC Capital Markets таҳлилчиси.

Унинг сўзларига кўра, бу корпорациялар тахминан 50 миллиард долларни акциядорларга дивидендлар кўринишида тўламоқчи. Шунингдек, нефть нархи ўсишда давом этса, акциядорларнинг даромади янада юқори бўлиши мумкин.

Аввалроқ Саудия фонди Aramco’нинг 80 миллиард долларлик улушини қўлга киритгани хабар қилинганди. Шунингдек, Дунёнинг энг йирик нефть компанияси 50 миллиард долларлик акцияларини сотиши ҳақида хабар берилди.