Уоррен Баффет миллиардерлар рейтингида Meta ва Google асосчиларидан ўзиб кетди
Бизнесменнинг бойлиги йил бошидан бери 2,39 миллиард долларга ортган.
Миллиардер Уоррен Баффет молиявий ҳолати бўйича Марк Цукербергдан ўзиб кетди. Бу ҳақда Bloomberg ёзмоқда.
Қайд этилишича, Уоррен Баффетнинг бойлиги 2022 йил 2,39 миллиард долларга ўсиб, 111 миллиард долларга етган. Энди у Марк Цукербергдан 1 миллиард доллар олдинда. Шу тариқа Баффет миллиардерлар рўйхатида 6-ўринга кўтарилиб олди.
Meta Platforms (собиқ Facebook) асосчиси Марк Цукербергнинг бойлиги 2022 йил бошидан буён 12 фоизга ёки 15,2 миллиард долларга камайган. 28 январь ҳолатига кўра, унинг молиявий ҳолати 110 миллиард долларни ташкил этмоқда.
Йил бошидан буён Meta акциялари ўз қийматининг қарийб 13 фоизини йўқотган. Уоррен Баффет бойлигининг 98 фоизини ташкил этувчи Berkshire Hathaway компаниясининг А тоифали инвестиция холдинги эса 2,3 фоизга қимматлаган.
Баффет, шунингдек, Google холдинг компанияси бўлмиш Alphabet асосчиси Сергей Бринни ҳам ортда қолдирди, унинг бойлиги 111 миллиард долларни ташкил этмоқда. Брин йил бошидан бери ўз капиталининг 10 фоизини ёки 12,4 миллиард долларини йўқотган. Шу тариқа, у Bloomberg Billionaires Index’да Баффетдан сўнг еттинчи ўринни эгаллаб турибди.
Дунё миллиардерлари рейтингида Илон Маск етакчилик қилмоқда. Айни вақтда унинг молиявий ҳолати 216 миллиард долларга баҳоланмоқда.
Аввалроқ Уоррен Баффет Apple’нинг рекорд капиталлашуви туфайли 120 млрд доллар ишлаб олгани хабар қилинганди. Шунингдек, миллиардер қандай китоблар ўқиши ҳақида батафсил маълумот берилганди.
