«Сбербанк» бошқаруви раисининг собиқ биринчи ўринбосари Лев Хасис АҚШга жўнаб кетди, деб хабар бермоқда «Ведомости» манбалари. У Америка фуқаролигига эга.
Нашрнинг ёзишича, банк унга электрон тижоратни ишониб топширишни режалаштирган бўлса-да, у билан ҳамкорликни давом эттирмайди.
«Ведомости» манбалари Хасиснинг мамлакатни қачон тарк этгани ҳақида турли маълумотларни келтирмоқда. Бири у Россиянинг Украинага ҳужуми бошланганидан сўнг дарҳол чиқиб кетганини даъво қилса, иккинчиси Хасис бундан бироз олдин мамлакатни тарк этганини таъкидлайди.
Нашр суҳбатдошининг фикрича, собиқ топ-менежернинг кетиши банкнинг «Самокат» хизматидаги вазиятни мураккаблаштиради. Бу, хусусан, ҳудудлардаги хизмат ишининг қисқаришига олиб келди.
«У ‘Сбербанк’ топ-менежерлари орасида биринчилардан бўлиб мамлакатни тарк этди, бу эса ходимларни ҳайратда қолдирди. Ундан кейин технологик блокни бошқарган Давид Рафаловский (катта вице-президент, гуруҳнинг техник директори — таҳр.) ҳам Россиядан кетди», — деди банкдаги нашр манбаси.
Маълумот учун, 15 апрель куни «Сбербанк» Хасиснинг 2022 йил 1 июндан бошлаб банк бошқаруви раисининг биринчи ўринбосари лавозимини тарк этиш тўғрисидаги қарори тасдиқлангани ҳақида хабар берди. Шундан сўнг у электрон тижорат ҳолдингининг президенти бўлиши режалаштирилган эди.
Аввалроқ «Яндекс» компаниясининг Россиядаги бош директори Елена Бунина мамлакатни тарк этганди.
