«Яндекс»нинг Россиядаги бош директори мамлакатни тарк этди
Елена Бунина бош директорлик ва компаниядаги бошқа лавозимларини босқичма-босқич топширади.
«Яндекс» компаниясининг Россиядаги бош директори Елена Бунина мамлакатни тарк этди ва қайтиш ниятида эмас. Бу ҳақда у компаниянинг ички форумидаги хабарида маълум қилди.
Бунинанинг сўзларига кўра, Россиянинг Украинадаги уруши бошланган пайтда у Кипрда таътилда бўлган ва шундан бери Россияга қайтмаган.
«Мен 1 март куни Исроилга учиб келдим ва сўнгги бир ойдан бери Тел-Авивдаги офисдан ишлаяпман. Мен қайтиб келмайман: қўшнилари билан уришадиган мамлакатда яшай олмайман», — деди топ-менежер.
У 15 апрель куни «расмий равишда» «Яндекс» бош директори лавозимини тўхтатиб, «қолган ролларини» аста-секин топширишини таъкидлади. «Яндекс» вакили Бунинанинг компания раҳбари лавозимидан кетишини тасдиқлади.
«Артем Савиновский ‘Яндекс’ компаниясининг Россиядаги бош директори вазифасини бажарувчи этиб тайинланди. Кейинги ўзгаришлар ҳақида кейинроқ маълумот берамиз», — дейилади матбуот хизмати хабарида.
Март ойи ўрталарида «Яндекс» Буниннинг ўрнига Тигран Худавердян бош директор этиб тайинланишини ва у бу ишни ҳозирги бошқарувчи директор лавозими билан бирлаштиришини эълон қилганди. Кейин компания Бунина 15 апрелгача бош директор лавозимида ишлашда давом этишини эълон қилди.
Аввалроқ «Яндекс» Буюк Британия ва Францияда етказиб бериш хизматини тўхтатиши мумкинлиги хабар қилинганди. Шунингдек, «Яндекс»нинг собиқ ходими Instagram’нинг яна бир русча вариантини ишга туширгани ҳақида хабар берилди.