Иқтисодчи Отабек Бакиров Ўзбекистонда банкоматлар етишмаётганига сабаб банкларда янги банкоматлар сотиб олишга рағбат йўқлиги эканини айтди. Мутахассис бу ҳақда Kommers.uz билан суҳбатда гапириб ўтди.

«Банкоматлар нима учун етишмаяпти? Чунки банкларда янги банкоматлар сотиб олиш, уларнинг тармоғини кенгайтиришга рағбати йўқ.

Билмайман, ҳозир аниқ рақам қўлимда йўқ. Адашмасам, 10 минг атрофида банкомат бўлса керак, бу етарли эмас. Ўзбекистоннинг 36 миллион аҳолиси учун бу етарли эмас. Нима сабабдан шу банкоматлар сони 20 минг, ёки 30–40 мингта эмас?», — деди Отабек Бакиров.

Иқтисодчининг таъкидлашича, банкоматлар тармоғининг ривожланиши давлат турткиси билан эмас, табиий равишда рўй бериши керак.

«Агар банкларда юқори даражада рағбат шаклланса, ўз-ўзидан пул сарфлаб олиб келади уни. Оддий мисол сифатида айтаман: Битта банкомат битта машинанинг пули сингари. Агар сиз машинадан рағбат кўрмасангиз, уни сотиб олмайсизку.

Ҳозирча маъмурий йўл билан, давлатнинг турткиси билан банкоматлар тармоғи ривожланяпти. Бу табиий равишда рўй бериши керак», — деди мутахассис.

Аввалроқ Марказий банк айрим банкоматларда тажриба тариқасида комиссия миқдори оширилганига муносабат билдирганди.

Регуляторнинг таъкидлашича, банкоматлардан нақд пул ечиш учун комиссия тўловлари тижорат банклари томонидан банкоматга хизмат кўрсатиш харажатларидан келиб чиқиб мустақил белгиланади ва бугунги кунда 1 фоиздан ошмайди.

Марказий банкнинг тушунтиришича, айрим тижорат банки томонидан алоҳида бир банкоматда эксперимент тариқасида табақалашган юқори комиссия тўлови ўрнатилган бўлса, эркин бозор шароитида бу ўзини оқламайди.