HeadHunter компанияси Kommers.uz’га Ўзбекистонда ўсмирлар қаерда ишлашни истаётгани, компаниялар қайси соҳаларда ўсмирларни ишга олиши ва тажрибасиз ҳодимларга қайси соҳаларда талаб борлиги бўйича шарҳни тақдим этди.

Таъкидланишича, иш тажрибаси ёки маҳоратига эга бўлган ўсмирлар учун иш топиш осон ҳисобланади. Масалан, дастурлаш тилларини билиш, макет, дизайн, SMM, ижтимоий тармоқларда саҳифаларни юритиш, рақамлар ва жадваллар билан ишлаш тажрибаси бор номзодлар иш топишда камроқ қийинчиликка учрайди.

Тажрибасизлик эса янги бошловчилар учун стандарт ҳолат экани ва бу ерда ҳеч қандай даҳшатли ва қораланадиган нарса йўқ. Кўпинча тажрибасиз йигитлар меҳмонхоналарда, кафеларда, ресторанларда, овқатланиш жойларида ишлашга ва ярим кунлик ишлаш билан шуғулланшига тайёр экани таъкидланган.

Ўсмирлар орасида энг машҳур ишлар қуйидагилар:

• Курьерлар — ҳужжатларни, товарларни қабул қилиш ва етказиб бериш.
• Маъмурий иш — қўнғироқларни қабул қилиш, матн териш, ҳужжатларни қайта ишлаш.
• Тарғибот ходимлари — варақалар тарқатиш, акциялар, кўргазмалар, тадбирларда иштирок этиш.
• Аналитик иш — маълумотларни йиғиш, қайта ишлаш, таҳлил қилиш.
• Маркетинг ва реклама — матнлар ёзиш, ижтимоий тармоқларда саҳифаларни юритиш, SMM.
• Дизайн, макет — тасвирни компьютерда қайта ишлаш.

Аввалроқ Ўзбекистондаги иш изловчилар учун энг даромадли соҳалар маълум қилинганди.