Дунёнинг энг бой одами Илон Маск бир қанча уринишлардан сўнг машҳур ижтимоий тармоқ — Twitter’ни тўлиқ сотиб олиш бўйича келишувга эришди. Kommers.uz миллиардер ва ижтимоий тармоқ атрофида содир бўлган воқеаларга батафсил тўхталади.
Tesla асосчиси ва раҳбари Илон Маскнинг бойлиги Twitter’ни сотиб олиши фонида 29 миллиард долларга камайди, деб ҳисоблайди Forbes.
Нашрнинг 27 апрель куни эрталабки маълумотларига кўра, миллиардернинг реал вақтдаги бойлиги 239,2 миллиард долларни ташкил этди ва у дунёдаги энг бадавлат одам бўлишда давом этмоқда.
Таъкидланишича, 26 апрель куни Twitter директорлар кенгаши миллиардернинг ижтимоий тармоқни 44 миллиард долларга сотиб олишини маъқуллагани ҳақидаги хабар туфайли Tesla акциялари нархи тушиб кетган ва Маскнинг бойлиги камайган.
Forbes ҳисоб-китобларига кўра, электромобиллар ишлаб чиқарувчисининг капиталлашуви бир кунда 130 миллиард долларга, Маскнинг бойлиги 29 миллиард долларга камайган. Бу Маск 24 соатдан камроқ вақт ичида Дональд Трампнинг тўққиз бойлигига тенг маблағни йўқотганини англатади.
Tesla «қурбон» бўладими?
Маскнинг бойлигининг катта қисми Tesla компаниясидаги улушига тўғри келади, Маск у ерда 21 фоиз улушга эгалик қилади.
«Компания сармоядорлари Маск бир вақтнинг ўзида учта компанияни (Tesla, SpaceX ва Twitter) самарали бошқара олишига ишонмаяпти ва Маск Twitter’ни сотиб олиш учун кредитларга Tesla акцияларидан гаров сифатида фойдаланишга мажбур бўлишидан қўрқади», дея тушунтирди Forbes.
Қисман, бу қўрқувлар ўзини оқлади: 25 апрель куни Маск 62,5 миллиард долларлик Tesla акцияларини 12,5 миллиард долларлик маржали кредит (банклар қарзи 13 миллиард долларни ташкил этади) олиш учун гаровга қўйишини маълум қилди.
Бундан ташқари, инвесторлар миллиардер Twitter’ни сотиб олишни молиялаштириш учун ўз акцияларининг бир қисмини сотишига тўғри келиши мумкинлигини истисно қилмаяпти. Маск Twitter’ни ўз чўнтагидан сотиб олиш учун 21 миллиард доллар тўлашга ваъда берди.
Forbes маълумотларига кўра, Маскнинг ҳозирда тахминан 2 миллиард доллар нақд пули бор: 2021 йил охирида у Tesla’нинг 16 миллиард долларлик акцияларини сотди, ундан солиқларни қайтарди, 6 миллиард долларни хайрия ишларига сарфлади ва Twitter’даги дастлабки улушини сотиб олиш учун 2,6 миллиард доллар тўлади.
Twitter ва Маск: ҳаммаси нимадан бошланди?
Америкалик миллиардер Илон Маск март ойи охирида Twitter’нинг 9,2 фоиз улушини сотиб олди. Tesla ва SpaceX асосчиси Илон Маск Twitter’нинг 9,2 фоиз улушини сотиб олди. Ушбу янгилик фонида Twitter акциялари премаркет давомида 26 фоизга ошди.
Шундан сўнг Twitter Илон Маскни компания директорлар кенгашига киритгани ҳақида хабар берилди. Лекин кейинчалик миллиардер кенгашига киришдан бош тортди. Ижтимоий тармоқ бош директори Параг Агравалнинг маълум қилишича, Маск Twitter’нинг энг йирик акциядори бўлиб қолади ва компания ҳали ҳам унинг таклифларига очиқ.
Маск ўзининг Twitter’ида иккита янги сўровнома жойлаштирди. Биринчисида у компаниянинг Сан-Францискоdaги бош қароргоҳини уйсизлар бошпанасига айлантириш керакми, деб сўради, чунки барибир офисга «ҳеч ким бормайди». Иккинчисида у Twitter’ни Titter қилиш учун компания номидан W ҳарфини олиб ташлашни таклиф қилди.
Amazon асосчиси Жефф Безос Илон Маскнинг Twitter штаб-квартирасида уйсизлар учун бошпана яратиш ғоясини қўллаб-қувватлади. Бошпана сифатида бутун штаб-квартирани эмас, балки унинг бир қисмини ажратиш мумкин, деб ёзди Безос ижтимоий тармоқда.
Кейинчалик Twitter акциядори Марк Бейн Расселл Илон Маск устидан судга мурожаат қилди. Унинг сўзларига кўра, тадбиркорга тегишли акцияни Twitter’да ошкор этишнинг кечикиши (5 фоиздан ортиқ) акциялар нархини сунъий равишда пастроқ даражада ушлаб турган.
Даъво Манхэттен Федерал судига қимматли қоғозлар бўйича фирибгарлик моддаси бўйича топширилмоқда. Ҳужжатга кўра, Маск 24 март куни SEC’га ўз улушини ошкор қилиши керак бўлган ва буни 1 апрелда бажарган.
Маскнинг кечикиши унга кўпроқ акцияларни арзонроқ нархда сотиб олиш ва шу тариқа акция сотувчиларни алдаш, уларни қўшимча имтиёзлардан маҳрум қилиш имконини берган. Маск изоҳ сўровига жавоб бермаган. Twitter ҳам даъвога изоҳ беришдан бош тортган.
Маск 14 апрел куни Twitter акцияларини ҳар бирини 54,2 доллардан сотиб олиш истагини билдирди (бу 13 апрель кунги савдолар якунидаги акция нархидан 18,2 фоизга юқори). Тадбиркор ижтимоий тармоқни 43 миллиард долларга сотиб олмоқчи. Маскнинг фикрича, бу унинг «энг яхши ва якуний» таклифи.
Twitter раҳбарияти мавжуд акциядорларга қўшимча акцияларни сотиб олишни ва Илон Маск учун «заҳарли дори» ҳолатини яратишни таклиф қилиши мумкинлиги ҳақида хабарлар тарқалди. Акциядорлар қўшимча акцияларни катта чегирма билан сотиб олишлари мумкин бўлади. Шунда Маск сотиб олмоқчи бўлган улуш «камроқ жозибадор» бўлади.
Кейинчалик Маск Twitter’ни сотиб олиш учун ўз маблағидан 10–15 миллиард доллар сармоя қилишга тайёр, деб ёзди New York Post (NYP) икки манбага таяниб.
Бир қанча ОАВлар Twitter компанияни дунёнинг энг бой одами Илон Маскка сотиш имкониятини муҳокама қилаётгани ва шу ҳафтанинг бошида шартномани ёпиши мумкинлиги ҳақида хабар берди.
Шундан сўнг миллиардер Twitter акцияларининг 100 фоизини ҳар бир донасини 54,2 доллардан сотиб олиб, ижтимоий тармоқ эгасига айланиши аниқ бўлди.
