Илон Маск Twitter директорлар кенгашига киритилди
Миллиардернинг директорлар кенгашидаги ваколати 2024 йилда тугайди.
Twitter Илон Маскни компания директорлар кенгашига киритди. Бу ҳақда Bloomberg ижтимоий тармоқ баёнотига таяниб хабар берди.
Баёнотга кўра, Илон Маск ўз ваколати даврида ва у тугагандан кейин 90 кун давомида Twitter’нинг 14,9 фоиздан кўп улушига эгалик қилмайди. Маскнинг ваколат муддати 2024 йилда тугайди.
Нью-Йоркнинг NYSE фонд биржаси савдолари бошида Twitter акциялари 4 фоизга қимматлашди ва 51,9 долларни ташкил қилди. 4 апрель куни Маск ижтимоий тармоқ акциядорига айлангани ҳақидаги хабарда акциялар нархи 27 фоизга ошди.
Маск Twitter’даги улушини сотиб олгани ҳақида компания 4 апрель куни маълум қилди. Ишбилармон эндиликда Twitter’нинг 73,4 миллионга яқин оддий акциясига ёки 9,2 фоиз улушга эгалик қилади. Шу тариқа Маск ижтимоий тармоқнинг энг йирик акциядорларидан бирига айланди.
Илон Маск Forbes журнали томонидан 5 апрель куни эълон қилинган дунёнинг энг бой одамлари рейтингида биринчи ўринни эгаллади. Тадбиркорнинг бойлиги 219 миллиард долларга баҳоланган.