Twitter компанияни дунёнинг энг бой одами Илон Маскка сотиш имкониятини муҳокама қилмоқда ва шу ҳафтанинг бошида шартномани ёпиши мумкин. Бу ҳақда The Wall Street Journal келишув музокараларидан хабардор манбаларга таяниб хабар берди.

Twitter ижтимоий тармоғи Илон Маскнинг компанияни эгаллаш ҳақидаги таклифига муносабатини қайта кўриб чиққан. Икки томон 25 апрель, якшанба куни учрашиб, Маскнинг таклифини муҳокама қилди ва муваффақиятга эришди, дея хабар беради газета манбалари.

Илгари Twitter бу таклифни бутунлай рад этиши кутилганди, бироқ дунёнинг энг бой одами 46,5 миллиард долларлик келишув учун маблағ тўплаганини ошкор қилганидан кейин бу позиция ўзгарди.

Twitter музокаралар олиб боришга интилиш эҳтимоли аввалгидан кўра кўпроқ, дейди масала билан таниш одамлар. WSJ суҳбатдошларининг баъзиларининг таъкидлашича, компания ўз қийматини баҳолаш устида ишламоқда.

Нашр суҳбатдошлари Twitter биринчи чоракдаги ва ундан ҳам аввалги даромадлар ҳақида ҳисобот берганида — 25 апрель, пайшанба куни Маскга жавоб бериши мумкинлигини тахмин қилди.

Twitterning қарори бошқа иштирокчиларни келишувга таклиф қилиш ёки Маск билан у таклиф қилган нархдан бошқа шартларда музокаралар олиб бориш учун эшикни очиқ қолдириши мумкин.

«Маск сўнгги кунларда Twitter раҳбари Брет Тейлорга ҳар бир акция учун 54,2 долларлик таклифидан воз кечиш нияти йўқлигини айтди», — деди манбалар.

Илон Маск 22 апрель куни компаниянинг бир қанча акциядорлари билан якка тартибда учрашиб, уларга ўз таклифининг афзалликларини тушунтирди. Маскнинг йиғилишлардан кейин унга эргашмоқчи бўлган баъзи акциядорлари бор.

Thrivent Asset Management катта ҳажмдаги ўсиш фондини бошқарадиган Лаури Бруннер Маскни малакали ижтимоий медиа оператори сифатида кўради.

«Маск Tesla’да ўрнатилган тажрибага эга. У Twitter’даги кучли операцион самарадорликнинг катализаторидир», — деди у.

Миннеаполисда жойлашган Thrivent Twitter’нинг тахминан 0,4 фоиз улушига эгалик қилади, бу 160 миллион долларга тенг, шунингдек Tesla акциядори ҳам ҳисобланади.

«Twitter директорлар кенгаши Маск билан ҳамкорлик қилиши керак, чунки унинг акциялари компания саккиз йил аввал биржага чиққанидан бери ҳеч қачон ҳеч қаёққа кетмаган», — деди Ньью-Йоркдаги 385 миллион доллар активларни бошқарадиган Bandera Partners хедж-фондининг портфель менежери Жефф Грэм.

Жамғарма Twitter актсияларини охирги марта февраль ойида сотиб олган ва жами 950 мингга яқин акцияга эгалик қилади (портфелининг тахминан 11 фоизи). Грэмнинг қайд этишича, Twitter директорлар кенгаши акциядорларга муносиб муқобил таклиф қилмасдан туриб Маскнинг таклифидан воз кечолмайди.

Twitter ва Маск

Америкалик миллиардер Илон Маск март ойи охирида Twitter’нинг 9,2 фоиз улушини сотиб олди. Tesla ва SpaceX асосчиси Илон Маск Twitter’нинг 9,2 фоиз улушини сотиб олди. Ушбу янгилик фонида Twitter акциялари премаркет давомида 26 фоизга ошди.

Шундан сўнг Twitter Илон Маскни компания директорлар кенгашига киритгани ҳақида хабар берилди. Лекин кейинчалик миллиардер кенгашига киришдан бош тортди. Ижтимоий тармоқ бош директори Параг Агравалнинг маълум қилишича, Маск Twitter’нинг энг йирик акциядори бўлиб қолади ва компания ҳали ҳам унинг таклифларига очиқ.

Маск ўзининг Twitter’ида иккита янги сўровнома жойлаштирди. Биринчисида у компаниянинг Сан-Францискоdaги бош қароргоҳини уйсизлар бошпанасига айлантириш керакми, деб сўради, чунки барибир офисга «ҳеч ким бормайди». Иккинчисида у Twitter’ни Titter қилиш учун компания номидан W ҳарфини олиб ташлашни таклиф қилди.

Amazon асосчиси Жефф Безос Илон Маскнинг Twitter штаб-квартирасида уйсизлар учун бошпана яратиш ғоясини қўллаб-қувватлади. Бошпана сифатида бутун штаб-квартирани эмас, балки унинг бир қисмини ажратиш мумкин, деб ёзди Безос ижтимоий тармоқда.

Кейинчалик Twitter акциядори Марк Бейн Расселл Илон Маск устидан судга мурожаат қилди. Унинг сўзларига кўра, тадбиркорга тегишли акцияни Twitter’да ошкор этишнинг кечикиши (5 фоиздан ортиқ) акциялар нархини сунъий равишда пастроқ даражада ушлаб турган.

Даъво Манхэттен Федерал судига қимматли қоғозлар бўйича фирибгарлик моддаси бўйича топширилмоқда. Ҳужжатга кўра, Маск 24 март куни SEC’га ўз улушини ошкор қилиши керак бўлган ва буни 1 апрелда бажарган.

Маскнинг кечикиши унга кўпроқ акцияларни арзонроқ нархда сотиб олиш ва шу тариқа акция сотувчиларни алдаш, уларни қўшимча имтиёзлардан маҳрум қилиш имконини берган. Маск изоҳ сўровига жавоб бермаган. Twitter ҳам даъвога изоҳ беришдан бош тортган.

Маск 14 апрел куни Twitter акцияларини ҳар бирини 54,2 доллардан сотиб олиш истагини билдирди (бу 13 апрель кунги савдолар якунидаги акция нархидан 18,2 фоизга юқори). Тадбиркор ижтимоий тармоқни 43 миллиард долларга сотиб олмоқчи. Маскнинг фикрича, бу унинг «энг яхши ва якуний» таклифи.

Twitter раҳбарияти мавжуд акциядорларга қўшимча акцияларни сотиб олишни ва Илон Маск учун «заҳарли дори» ҳолатини яратишни таклиф қилиши мумкинлиги ҳақида хабарлар тарқалди. Акциядорлар қўшимча акцияларни катта чегирма билан сотиб олишлари мумкин бўлади. Шунда Маск сотиб олмоқчи бўлган улуш «камроқ жозибадор» бўлади.

Кейинчалик Маск Twitter’ни сотиб олиш учун ўз маблағидан 10–15 миллиард доллар сармоя қилишга тайёр, деб ёзди New York Post (NYP) икки манбага таяниб.