Илон Маск Twitter’ни тўлиқ сотиб олиш бўйича таклиф билан чиқди. Таклифдан сўнг акцияларда кескин ўсиш кузатилди
Илон Маск компаниянинг ажойиб салоҳиятга эга экани ва буни очиб беришини айтган.
Tesla ва SpaceX раҳбари, миллиардер Илон Маск Twitter’ни сотиб олиш бўйича «энг яхши ва якуний» таклиф билан чиқди. Бу ҳақда Bloomberg агентлиги Маск томонидан АҚШ Қимматли қоғозлар ва биржалар комиссиясига тақдим этган ҳужжатларга таяниб хабар бермоқда.
Қайд этилишича, у компаниянинг ажойиб салоҳиятга эга экани ва буни очиб беришини айтган.
Маск ҳар бир акция учун 54,2 доллардан нақд пулга таклиф қилишга тайёр. Келишув амалга оширилган тақдирда, Twitter’нинг баҳоси тахминан 43 миллиард долларга баҳоланади.
«Мақолани ёзиш вақтида Twitter акциялари ҳар бир акция учун 45,85 долларга баҳоланганди. Таклифдан кейин улар 18 фоизга кўтарилди», дея таъкидлайди агентлик.
Савдо маълумотларига кўра, Тошкент вақти билан 15:36 да Twitter акциялари премаркет савдоларида яна 12 фоизга ошиб, 51,37 долларга етди.
Twitter ва Маск
Америкалик миллиардер Илон Маск март ойи охирида Twitter’нинг 9,2 фоиз улушини сотиб олди. Tesla ва SpaceX асосчиси Илон Маск Twitter’нинг 9,2 фоиз улушини сотиб олди. Ушбу янгилик фонида Twitter акциялари премаркет давомида 26 фоизга ошди.
Шундан сўнг Twitter Илон Маскни компания директорлар кенгашига киритгани ҳақида хабар берилди. Лекин кейинчалик миллиардер кенгашига киришдан бош тортди. Ижтимоий тармоқ бош директори Параг Агравалнинг маълум қилишича, Маск Twitter’нинг энг йирик акциядори бўлиб қолади ва компания ҳали ҳам унинг таклифларига очиқ.
Маск ўзининг Twitter’ида иккита янги сўровнома жойлаштирди. Биринчисида у компаниянинг Сан-Францискоdaги бош қароргоҳини уйсизлар бошпанасига айлантириш керакми, деб сўради, чунки барибир офисга «ҳеч ким бормайди». Иккинчисида у Twitter’ни Titter қилиш учун компания номидан W ҳарфини олиб ташлашни таклиф қилди.
Amazon асосчиси Жефф Безос Илон Маскнинг Twitter штаб-квартирасида уйсизлар учун бошпана яратиш ғоясини қўллаб-қувватлади. Бошпана сифатида бутун штаб-квартирани эмас, балки унинг бир қисмини ажратиш мумкин, деб ёзди Безос ижтимоий тармоқда.
Кейинчалик Twitter акциядори Марк Бейн Расселл Илон Маск устидан судга мурожаат қилди. Унинг сўзларига кўра, тадбиркорга тегишли акцияни Twitter’да ошкор этишнинг кечикиши (5 фоиздан ортиқ) акциялар нархини сунъий равишда пастроқ даражада ушлаб турган.
Даъво Манхэттен Федерал судига қимматли қоғозлар бўйича фирибгарлик моддаси бўйича топширилмоқда. Ҳужжатга кўра, Маск 24 март куни SEC’га ўз улушини ошкор қилиши керак бўлган ва буни 1 апрелда бажарган.
Маскнинг кечикиши унга кўпроқ акцияларни арзонроқ нархда сотиб олиш ва шу тариқа акция сотувчиларни алдаш, уларни қўшимча имтиёзлардан маҳрум қилиш имконини берган. Маск изоҳ сўровига жавоб бермаган. Twitter ҳам даъвога изоҳ беришдан бош тортган.