Президент тўқимачилик соҳасидаги 50 та брендни Ўзбекистонга олиб келиш бўйича топшириқ берди
Халқаро кўргазмаларда камида 30 та ўзбекистонлик ишлаб чиқарувчи маҳсулотини олиб чиқиб, 50 млн доллардан буюртма олиш таъминланади.
Шавкат Мирзиёев 2022 йил охиригача бир нечта хорижий давлатлардаги Ўзбекистон элчилари билан 50 та хорижий брендни Ўзбекистонга олиб келиш бўйича топшириқ берди. Бу ҳақда Президент матбуот котиби хабар бермоқда.
Давлат раҳбарининг таъкидлашича, Ўзбекистон пахтасига бойкот бекор қилинганидан сўнг хорижий бренд ва йирик компаниялар маҳаллий корхоналар билан ҳамкорлик қилишга катта қизиқиш билдирмоқда.
Президентнинг сўзларига кўра, «очиқ айтиш керак», тўқимачилик саноатини ташқи бозорларга олиб чиқиш, брендлар ва йирик корхоналарни жалб қилишда элчихоналар ишламаяпти.
«Мисол учун, биздаги Туркия, Хитой, Германия каби бошқа давлатлар элчилари ўз мамлакати тадбиркорларининг манфаатини ҳимоя қилиш учун вазир, ҳоким, ҳатто корхонагача боришдан чарчамайди. Лекин, бизнинг элчиларда бундай ташаббус ҳали йўқ!», — деди Шавкат Мирзиёев.
Шу муносабат билан2022 йил якунига қадар:
Испания, Германия ва Швеция, Буюк Британия, Франция, Италия, Польша, Япония, Туркия, АҚШдаги элчилар билан бирга 50 та хорижий брендларни юртимизга олиб келиш;
халқаро кўргазмаларда камида 30 та ўзбекистонлик ишлаб чиқарувчи маҳсулотини олиб чиқиб, 50 миллион доллардан буюртма олишни таъминлаш топширилди.
Аввалроқ Президент тўқимачилик Ўзбекистонга кам харажат билан олтиндан ҳам кўп даромад келтирадиган соҳа эканини айтганди.
Бойкот ва унинг бекор қилиниши
Ўзбекистон фуқаролик жамияти фаолларининг 2009 йилдаги ўзбек пахтасини бойкот қилишга чақирган петициясига жавобан компаниялар шахсий мажбуриятларни қабул қила бошлаган ва Cotton Campaign «Ўзбек пахтасига бойкот» эълон қилганди.
Ўшандан бери 331 та бренд ва ритейлер компаниялари, жумладан, C&A, Gap Inc., H&M, Levi Strauss & Co., Tesco ва Walmart каби дунёнинг кўплаб йирик брендлари ўзбек пахтасига нисбатан бойкотга амал қилиш мажбуриятини олган.
Эслатиб ўтамиз, Cotton Campaign халқаро коалицияси 10 март куни ўзбек пахтасига эълон қилинган бойкотни бекор қилди. Бу эълон коалициянинг етакчи ҳамкори бўлган «Инсон ҳуқуқлари бўйича Ўзбек форуми» томонидан 2021 йилда пахта теримида ўтказилган мустақил мониторинг натижаларига асосан қабул қилинган. Ҳисоботда ҳукумат томонидан ташкил қилинадиган мажбурий меҳнат ҳолатлари аниқланмагани эълон қилинган.
Кейиинчалик Шавкат Мирзиёев Ўзбекистон пахтасига бойкотнинг бекор қилиниши мамлакат учун катта имконият яратишини таъкидлади.
Шунингдек, Fratelli Casa ва Uzbextile текстиль плаформаси ҳаммуассиси Шоҳруҳ Қаюмов Cotton campaign бойкотининг бекор қилиниши Ўзбекистонга нима бериши ҳақидаги мулоҳазалари билан бўлишди.
АҚШнинг Европада хавфсизлик ва ҳамкорлик бўйича комиссиясининг (Хельсинки комиссияси) катта сиёсий маслаҳатчиси Женис Хелвиг Сенат раиси Танзила Норбоева билан учрашувда Cotton Campaign халқаро коалицияси томонидан ўзбек пахтасига қўйилган бойкот бекор қилингани «муҳим воқеа» эканини айтди.