«Тўқимачилик — бизга кам харажат билан олтиндан ҳам кўп даромад келтирадиган соҳа» — Мирзиёев
Президент ишлаб чиқариш ҳажми 5 бараварга ошгани, экспорт эса 4 бараварга ўсиб, қарийб 3 миллиард долларга етганини қўшимча қилди.
Тўқимачилик Ўзбекистонга кам харажат билан олтиндан ҳам кўп даромад келтирадиган соҳа ҳисобланади. Бу ҳақда Шавкат Мирзиёев 28 июнь кунги видеоселектор йиғилишида айтиб ўтди.
Президент матбуот хизматининг ёзишича, мажлисда илмга асосланган уруғчилик ва агротехнологиялар ҳисобига пахта ҳосилдорлиги ва ҳажмини камида 30 фоизга ошириш ҳамда пахтани чуқур қайта ишлаб, соҳанинг экспортини камида 2 бараварга кўпайтириш муҳокама қилинмоқда.
«Бу – иқтисодиётимиз учун жуда катта имконият ва захирадир. Тўқимачилик бизга кам харажат билан олтиндан ҳам кўп даромад келтирадиган соҳа ҳисобланади. Шунинг учун биз соҳада тўлиқ кластер тизимини жорий этдик. Бугунги кунда пахта толасини ўзимизда 100 фоиз қайта ишлаш йўлга қўйилди (беш йил аввал 40 фоиз тола қайта ишланган)», — дейди Шавкат Мирзиёев.
Давлат раҳбарининг таъкидлашича, соҳани қўллаб-қувватлаш учун сўнгги уч йилда тўқимачилик кластерларига 23 триллион сўмдан зиёд имтиёзли маблағлар ажратилган.
Бундан ташқари, кластерларнинг ўзлари ҳам қарийб 7 триллион сўм хусусий инвестициялар йўналтирган. Натижада 350 га яқин йирик фабрикалар ишга туширилган.
Шунингдек, Президент ишлаб чиқариш ҳажми 5 бараварга ошгани, экспорт эса 4 бараварга ўсиб, қарийб 3 миллиард долларга етганини қўшимча қилди.
Давлат статистика қўмитаси маълумотларига кўра, 2022 йилнинг январь-апрель ойларида Ўзбекистондан қиймати 1,1 миллиард долларга тенг тўқимачилик маҳсулотлари экспорт қилинган.
Бу умумий экспорт ҳажмининг 15,1 фоизини ташкил этиб, 2021 йилнинг мос даврига нисбатан 24 фоизга ўсган.