Cotton Campaign томонидан Ўзбекистон пахтасига бойкотнинг бекор қилиниши мамлакат учун катта имконият яратади. Бу ҳақда Президент Шавкат Мирзиёев саноат кооперациясини ривожлантириш ва ишлаб чиқаришни маҳаллийлаштириш юзасидан ўтказилаётган йиғилишда маълум қилди.

«Сўнгги беш йилда қишлоқ хўжалиги соҳасидаги ислоҳотларимиз самарасини бериб, Cotton Campaign куни-кеча Ўзбекистонни ‘қора рўйхати’дан чиқарди. Бу ҳам биз учун жуда катта имконият, янги бозорлар дегани», — деди давлат раҳбари.

Президентнинг сўзларига кўра, бунинг ҳисобига истеъмол маҳсулотларининг хом-ашёсини олиб келиб, уларни қайта ишлаш орқали қўшимча 1,5 миллиард долларлик маҳсулотни бемалол экспорт қилса бўлади.

Шу боис, хом-ашёни олиб келиб, тайёр маҳсулот чиқарган ва уни четга сотадиган (божхона ҳудудида қайта ишловчи) корхоналарга апрелдан бошлаб экспортчилар учун берилаётган барча имтиёзлар татбиқ этилади.

Шунингдек, лойиҳалари доирасида техник-иқтисодий асос, маҳсулот сертификати, божхона тўловлари таъминоти талаб этилмайди.

Рухсатнома бериш муддати 3 баробар қисқаради, 1 йил давомида ишлаб келаётганларига рухсатнома ҳар бир контрактига эмас, балки корхона фаолиятига берилади. Шу билан бирга, корхоналар олиб келган дастгоҳлари учун божхона божлари ундирилмайди.

Аввалроқ Cotton Campaign Ўзбекистон пахтасига эълон қилинган 13 йиллик бойкотни бекор қилганди. Шунингдек, Шавкат Мирзиёев «маҳсулотбай» кооперацияни йўлга қўйиш зарурлигини айтгани ҳақида хабар берилди.