«Cotton Campaign ўзбек пахтасига қўйилган бойкотни бекор қилгани муҳим воқеадир» — Хелвиг
Хелвиг Ўзбекистонда ЕХҲТ тавсиялари ва бош принципларини татбиқ этиш давом эттирилишига умид билдирди.
Cotton Campaign халқаро коалицияси томонидан ўзбек пахтасига қўйилган бойкот бекор қилингани муҳим воқеадир. Бу ҳақда АҚШнинг Европада хавфсизлик ва ҳамкорлик бўйича комиссиясининг (Хельсинки комиссияси) катта сиёсий маслаҳатчиси Женис Хелвиг Сенат раиси Танзила Норбоева билан учрашувда айтиб ўтди.
Хельсинки комиссияси вакили одам савдосига қарши курашиш ва гендер масалалари билан шуғулланувчи, шунингдек, Марказий Осиё билан ишлаш борасида 25 йиллик тажрибага эга бўлган мутахассис сифатида Cotton Campaign халқаро коалицияси томонидан ўзбек пахтасига қўйилган бойкот бекор қилингани ҳам муҳим воқеа эканини айтиб ўтган.
Учрашувда бир қатор муҳим масалалар муҳокама қилинган. Шу жумладан, Ўзбекистоннинг сўнгги йилларда мажбурий меҳнат ва болалар меҳнатига барҳам бериш соҳасидаги катта ютуқларига эътибор қаратилган.
Шунингдек, Хелвиг Ўзбекистонда ЕХҲТ тавсиялари ва бош принципларини татбиқ этиш давом эттирилишига умид билдирган.
Бойкот ва унинг бекор қилиниши
Ўзбекистон фуқаролик жамияти фаолларининг 2009 йилдаги ўзбек пахтасини бойкот қилишга чақирган петициясига жавобан компаниялар шахсий мажбуриятларни қабул қила бошлаган ва Cotton Campaign «Ўзбек пахтасига бойкот» эълон қилганди.
Ўшандан бери 331 та бренд ва ритейлер компаниялари, жумладан, C&A, Gap Inc., H&M, Levi Strauss & Co., Tesco ва Walmart каби дунёнинг кўплаб йирик брендлари ўзбек пахтасига нисбатан бойкотга амал қилиш мажбуриятини олган.
Эслатиб ўтамиз, Cotton Campaign халқаро коалицияси 10 март куни ўзбек пахтасига эълон қилинган бойкотни бекор қилди. Бу эълон коалициянинг етакчи ҳамкори бўлган «Инсон ҳуқуқлари бўйича Ўзбек форуми» томонидан 2021 йилда пахта теримида ўтказилган мустақил мониторинг натижаларига асосан қабул қилинган. Ҳисоботда ҳукумат томонидан ташкил қилинадиган мажбурий меҳнат ҳолатлари аниқланмагани эълон қилинган.
Кейиинчалик Шавкат Мирзиёев Ўзбекистон пахтасига бойкотнинг бекор қилиниши мамлакат учун катта имконият яратишини таъкидлади.
Шунингдек, Fratelli Casa ва Uzbextile текстиль плаформаси ҳаммуассиси Шоҳруҳ Қаюмов Cotton campaign бойкотининг бекор қилиниши Ўзбекистонга нима бериши ҳақидаги мулоҳазалари билан бўлишди.