«Кафолат суғурта компанияси»даги деярли 70 фоиз давлат улуши сотилди
«UzAssets инвестиция компанияси» АЖ устав капиталига берилган 69,29 фоиз акция пакетини яхлит тарзда сотилган.
«Кафолат суғурта компанияси» акциядорлик жамиятининг 69,29 фоиз давлат улуши «GENESIS INNOVATION МЧЖга 72 миллиард сўмга сотилди. Бу ҳақда Давлат активларини бошқариш агентлиги ҳузуридаги UzAssets инвестиция компанияси матубот хизмати хабар берди.
Қайд этилигича, савдо жараёнининг дастлабки босқичида компаниядаги давлат улушини сотишга тайёрлаш ва инвестициявий жозибадорлигини оширишга қаратилган чоралар амалга оширилган.
Компания фаолияти таҳлили (due diligence) натижалари ва хусусийлаштириш бўйича маслаҳатчи — Grant Thornton ҳалқаро компанияси тавсияси асосида «UzAssets инвестиция компанияси» АЖ устав капиталига берилган 69,29 фоиз акция пакетини яхлит тарзда, рақобатга асосланган ошкора сотув жараёни орқали сотиш ташкил этилган.
Хабарга кўра, 2021 йил 31 августда берилган эълонга мувофиқ, 2021 йил 30 сентябргача бўлган муддатда талабгорларнинг акция пакетини сотиб олиш истаги тўғрисидаги аризалари қабул қилинган. Сотув жараёнида Ўзбекистон резидентлари бўлган 3 та талабгор иштирок этган.
Ҳар бир талабгорга компанияга оид молиявий, ҳуқуқий, ташкилий ва солиққа оид маълумотлар билан танишиш учун виртуал маълумотлар хонасига (VDR) кириш, компания менежменти ва хусусийлаштириш бўйича маслаҳатчига саволлар бериш, компанияга ташриф буюрган ҳолда ўрганиш имконияти яратилган.
Талабгорларнинг тақдим этган мажбуриятга эга таклифларини (binding offers) кўриб чиқиш натижалари ва мустақил баҳолаш ташкилоти томонидан аниқланган компания қийматини инобатга олиб, «Кафолат суғурта компанияси» акциядорлик жамиятининг 69,29 фоиз акция пакети «GENESIS INNOVATION МЧЖга 72 миллиард сўмга сотилган.
