ОТБ Ўзбекистонга 150 млн доллар кредит ажратади
Ушбу кредитларнинг камида 32,5 фоизи аёлларга берилиши керак. Шунингдек, Ўзбекистонда бозорга асосланган ипотека молиясини фаоллаштириш учун молиялаштириш механизмларини рағбатлантиради, уй-жой ипотека маҳсулотлари, шу жумладан яшил молиялаштириш имкониятларини кенгайтиради
Осиё тараққиёт банки (ОТБ) Ўзбекистон учун 150 миллион долларлик кредит ажратишни маъқуллади. Бу ҳақда банк расмий саҳифасида хабар берилди.
Маълум қилинишича, ОТБнинг Ипотека бозори секторини ривожлантириш дастури доирасидаги кредит Ўзбекистон Ипотека кредитларини қайта молиялаш компаниясини уй-жой ипотекаси, уй-жойларни ободонлаштириш кредитлари ва яшил реконструкция кредитларини қайта молиялаш учун маҳаллий валюта ресурсларидан фойдаланиш имкониятини таъминлайди. Ўзбекистонда қарз олувчилар яшил тикланиш кредитларидан иситиш ва совутиш тизимларини янгилаш ёки ўрнатиш, қуёш панелларини ўрнатиш, сув изоляциясини яхшилаш – энергия самарадорлигини ошириш учун фойдаланиши мумкин.
«Хавфсиз ва фаровон уй – бу инсоннинг асосий ҳуқуқи ва биз Ўзбекистонда ҳамёнбоп ипотека кредитларини оширишга ёрдам берганимиздан мамнунмиз. Ушбу дастур уй эгаларига уй хўжаликларининг энергия самарадорлигини ошириш ва иқлим таъсирини юмшатишга ёрдам беришидан хурсандмиз», деди ОТБнинг Марказий ва Ғарбий Осиё бўйича Бош директори Евгений Жуков.
ОТБ дастурига кўра, кредитларнинг камида 32,5 фоизи аёлларга берилиши керак. Кредит, шунингдек, Ўзбекистонда бозорга асосланган ипотека молиясини фаоллаштириш учун молиялаштириш механизмларини рағбатлантиради, уй-жой ипотека маҳсулотлари, шу жумладан яшил молиялаштириш имкониятларини кенгайтиради ва банк секторига маҳсулот инновацияларини олиб келади.
Аввалроқ Россия ва Украина ўртасидаги уруш сабабли ОТБ Ўзбекистонга 500 млн доллар кредит ажратиши ҳақида хабар берилганди. Шунингдек, ОТБ Оролбўйи сув ресурсларини бошқариш учун 150 млн АҚШ доллар қарз бериши маълум қилинганди.
