Ўзбекистонда давлат иштирокидаги корхоналарга қўшимча имтиёз бермаслик белгиланиши мумкин. Бу ҳақда Олий Мажлис Қонунчилик палатаси матбуот хизмати хабар берди.

Маълум қилинишича, «Давлат мулкини бошқариш тўғрисида»ги қонун лойиҳаси ишлаб чиқилган. Шунингдек, Қонунчилик палатасининг мажлисида муҳокамадан ўтказилиб, биринчи ўқишда қабул қилинган.

Мазкур ҳужжатда давлат мулки, улуши, муассасаси, унитар корхонаси, давлат иштирокидаги корхона, вакили, давлат мулки реестри, оператив бошқариш ҳуқуқи, хўжалик жамияти каби тушунчаларга таъриф берилган. Давлат мулки республика ва муниципал мулкларга ажратилган ҳолда уларга қандай мулклар кириши қайд этилган.

Шу билан бирга, давлат мулкини бошқаришнинг асосий принциплари келтирилган ҳолда, давлат мулкини бошқаришда соғлом рақобатни ривожлантириш учун тенг шароитларни яратиш, давлат иштирокидаги корхоналар ўз хўжалик фаолиятини нодавлат юридик шахслар билан тенг шароитларда амалга ошириши, уларга қўшимча имтиёзлар ва преференциялар бермаслик белгиланган.

Таъкидланишича, лойиҳани маромига етказиш, депутатлар томонидан билдирилган таклиф-тавсиялар асосида янада такомиллаштириш устида иш олиб борилмоқда. Қонун лойиҳасининг қабул қилиниши давлат мулкини бошқариш соҳасида масъул бўлган идораларни белгилаш, давлатнинг иқтисодиётдаги иштирокини камайтириш, давлат органлари ва маҳаллий давлат ҳокимияти органларининг масъулиятини оширишга хизмат қилади.

Аввалроқ капитал бозорида суғурта корхоналарининг иштироки қўшимча рағбатлантирилиши хабар қилинганди.