Саудия Арабистонининг нефть гиганти йилнинг биринчи ярмида рекорд даражада фойда кўрди
Саудия Арабистонининг Saudi Aramco компанияси йилнинг биринчи ярмида рекорд даражада фойда олганини эълон қилди. Чораклик ва ярим йиллик фойдага таъсир кўрсатган омиллар орасида Украинадаги уруш ва пандемиядан кейин глобал иқтисодиётнинг тикланиши фонида хом ашё нархларининг кескин ўсиши ва талабнинг ортиши келтирилган.
Саудия Арабистонининг нефть гиганти Saudi Aramco йилнинг биринчи ярмида рекорд даражада фойда кўрганини эълон қилди.
Маълум бўлишича, дунёдаги энг йирик нефть компанияси 87,9 миллиард долларга яқин даромад олган. Бу кўрсаткич 2021 йилга нисбатан деярли 90 фоизга кўп ҳисобланади. Чораклик ва ярим йиллик фойдага таъсир кўрсатган омиллар орасида Украинадаги уруш ва пандемиядан кейин глобал иқтисодиётнинг тикланиши фонида хом ашё нархларининг кескин ўсиши ва талабнинг ортиши кўрсатилган.
Қайд этилишича, июнь ойидан бери бир баррель нефть нархи 30 долларга арзонлашган, аммо нархлар ҳали ҳам 100 долларга яқин бўлиб турибди. Халқаро валюта жамғармаси прогнозларига кўра, Саудия Арабистони иқтисодиёти йил охиригача нархларнинг ошиши эвазига 7,6 фоизга ўсиши ва шу тариқа Қиролликнинг ялпи ички маҳсулоти триллион доллардан ошиши кутилмоқда.
Шунингдек, сўнгги ойларда Ғарб сиёсатчилари биринчи рақамли нефть экспортчисидан ишлаб чиқаришни кўпайтиришни талаб қилмоқда. OPEC+ сентябрь ойидан бошлаб ишлаб чиқаришни оширишини маълум қилган.
Аввалроқ Саудия Арабистони иқтисодиёти 2011 йилдан кейинги энг юқори чораклик ўсишни қайд этилганди. Унга кўра, таҳлилчилар Саудия Арабистони иқтисодиёти ўсишини, асосан, нефть секторига боғламоқда. Шунингдек, мамлакатда ишсизлик ҳам 2008 йилдан кейинги энг паст даражага тушгани қайд этилган.