Toyota Motor Corp. 2021 йилда тарихда биринчи марта Америка Қўшма Штатларида автомобиль савдоси бўйича ўзининг асосий рақобатчиси General Motors Co. компаниясини ортда қолдириб, биринчи ўринни эгаллади. Бу ҳақда «Интерфакс» нашри ёзмоқда.

Toyota 2020 йилдан бери Қўшма Штатлардаги сотувларини қарийб 10 фоизга ошириб, 2,3 миллион автомобилга етказди. Шу билан бирга, GM сотуви қарийб 13 фоизга тушиб, 2,2 миллион автомобилни ташкил этди. GM 1931 йилдан бери Америка автомобиль бозорида етакчи бўлиб келаётганди.

WSJ’нинг ёзишича, Toyota компаниясининг муваффақиятига асосан унинг танқислигидан олдин автомобиль электроникаси учун микрочипларни захиралаши ёрдам берди. Чунки Япония компанияси биринчи бўлиб АҚШда автомобилларга бўлган талабни тиклашга эътибор қаратди.

Toyota раҳбарияти Америка бозоридаги етакчиликни сақлаб қолиш кутилмаётганини маълум қилди.

«Аниқ айтиш керакки, бу бизнинг мақсадимиз эмас эди ва биз бу узоқ муддатда давом этишига ишонмаймиз», — деди Toyota’нинг Шимолий Америка катта вице-президенти Жек Ҳоллис.

J.D. Power тадқиқот компанияси прогнозига кўра, 2021 йилда Қўшма Штатларда жами автомобиль сотуви деярли 15 миллион автомобилни ташкил этди.