«Оскар» киномукофотининг тақдимотига қанча пул сарфланади?
«Оскар» ҳайкалчалари қанча туради, эфирга «кетадиган» реклама нархи нечпул ҳамда тақдимот билан боғлиқ бошқа рақамлар ҳақида (спойлер: тақдимотнинг умумий ҳаражатлари 56,9 млн АҚШ долларига тенг).
10-март, якшанба куни жаҳоннинг энг ёрқин юлдузлари Лос-Анжелесдаги Dolby Theatre биносида «Оскар» киномукофотининг 96 тақдимот маросимига йиғилади. Жаҳондаги энг нуфузли киномукофотлардан бири ҳисобланган «Оскар» тақдимоти билан боғлиқ ҳаражатларга Америка киноакадемияси қанча пул сарфлайди?
WalletHub «Оскар»-2024 мукофоти билан боғлиқ деярли барча ҳаражатларни ҳисоблаб, умумий рақам 56,9 млн АҚШ доллари атрофида бўлишини маълум қилмоқда.
Масалан, қизил йўлак учун тўшаладиган қизил рангли гиламга 24,700 АҚШ доллари сарфланади. Ушбу гиламларни 50 минг квадрат метр майдонга 600 соат давомида 18 кишидан иборат жамоа ёйиб чиқади.
«Оскар» ҳайкалчаларининг тахминий нархи эса 400 доллар. Улар 24 каратли олтин суви билан югуртирилган.
Маълумот учун, ғолиблар ушбу ҳайкалчаларни сотмоқчи бўлса, аввал, мукофот ташкилотчиси Америка киноакадемиясига 1 долларга сотиб олиш таклифини бериши шарт. Агар академия ҳайкалчани сотиб олмаса (бунақаси тарихда бўлмаган) мукофот совриндори «Оскар»ни истаган нархда истаган одамига сотиши мумкин.
«Оскар»ни қўлга киритган ғолибларга қиймати 125 минг АҚШ долларига тенг бўлган «конфет сумкалари» тақдим этилади. Бу йилги тақдимот учун тайёрлаб қўйилган «ширинлик қоплари»да Швейцария ва Сен-Барт оролига саёҳат қилиш учун йўлланма, Miage терини парвариш қилиш косметика тўплами ҳамда THOR Kitchen’дан қиммат ошхона анжомлари жой олган.
Қайд этиш керак, ғолибларга бериладиган «ҳамма ғалаба қозонади» деб ёзилган халталар аслида Киноакадемия ҳаражатларига кирмайди. Ушбу сумкалар Лос-Анжелесда жойлашган Specific Assets маркетинг агентлигининг совғаси ҳисобланади.
Тақдимотга келган таниқли актер ва актрисалар миллионлаб долларга тенг қимматбаҳо кийим ва тақинчоқларда кўриниш беради. Номзодларни кийинтириш, уларни тақинчоқлар билан «безаш» билан фақатгина йирик брендлар шуғулланади. Машҳурлар бренд кийимларда тақдимотда кўриниш бериш учун дизайнерлардан ўрта ҳисобда 1,5 млн АҚШ доллар талаб қилади.
Масалан, 2014 йилда Кейт Бланшетт тақдимотда қиймати 18,1 млн долларлик кийимда кўриниш берган. Аниқроғи актриса қиймати $100,000га тенг Armani Prive кўйлагида бўлган, бироқ $18 млнлик заргарлик тақинчоқларида саҳнага кўтарилган. 2019 йилда Леди Гага тақдимотга Tiffany&Cо’нинг 30 млн долларга тенг 128 каратли сариқ олмос билан безатилган тақинчоқларида ташриф буюрган. Ҳозирча, тақдимот тарихида энг қиммат образ айнан Леди Гагага тегишли.
«Оскар» маросимини тўғридан-тўғри эфирида 30 сониялик реклама нархи тахминан 2 млн АҚШ доллар. Тақдимотни тўғридан-тўғри намойиш қиладиган ABC телеканали камида 120 млн АҚШ долларга тенг реклама сотишни режалаштирмоқда. Телеканал қизил йўлакда юлдузлар ташрифини ёритиш пайтида эфирга кетадиган рекламадан камида 23 млн АҚШ доллар ишлаб олади.
«Оскар»ни қўлга киритиш учун фильм олиш билан иш битмайди. Мукофотни қўлга киритиш кўп куч ва меҳнат талаб қилади. Голливуд ҳар йили 100 млн доллардан ортиқ пулни у ёки бу лойиҳаларнинг лоббиси учун сарфлайди. Қайд этиш керак, бу рақам Голливуднинг баъзи фильмлари учун ажратидиган бюджетидан икки-уч баробар кўп.
The New York Times 2023 йилда фильмлар, актёрлар ва уларнинг рақиблари ҳақида жамоатчилик фикрини шакллантирадиган профессионал стратеглар мавжудлиги ҳақида катта суриштирув эълон қилганди.