«Ислом саккизлиги»га аъзо давлатлар ягона валюта жорий қилиши мумкин
Бангладеш, Миср, Индонезия, Эрон, Малайзия, Нигерия, Покистон ҳамда Туркия давлатлари ташкилот аъзоси ҳисобланади. Мамлакат раҳбарлари давлатлар ўртасида товар айрбошлаш ҳажмини 500 млрд АҚШ долларига етказмоқчи.
Бангладеш бош вазири Шайх Ҳасина ўзаро савдо ҳажмини ошириш мақсадида «Ислом саккизлиги» (D-8) мамлакатларида умумий валюта жорий этишни таклиф этди.
Шайх Ҳасина ушбу таклифни D-8 савдо вазирларининг йиғилишида эълон қилган.
«Агар биз Европа Иттифоқидан ўрнак олиб, мамлакатларимиз ўртасидаги савдони ривожлантириш учун умумий валютани жорий қилсак жуда яхши бўларди. Менинг мақсадим оддий одамларнинг фаровонлиги ва ижтимоий-иқтисодий аҳволини яхшилашдир. Агар биз ўзаро савдо ҳажмини ошира олсак, бошқаларга қарам бўлишимиз шарт эмас», — деган Ҳасина ташкилотнинг навбатдаги саммитида сўзга чиқиб.
«Ислом саккизлиги» ташкилотининг навбатдаги йиғилишида томонлар аъзо давлатлар ўртасидаги товар айирбошлаш ҳажмини $146 миллиарддан $500 миллиардгача ошириш режасини кўриб чиққан.
Қайд этиш керак, аввалроқ, Туркия давлати етакчичи Ражаб Тоййиб Эрдўғон D-8 ташкилотига аъзо мамлакатлар ўртасидаги товар айрбошлашдаги ҳисоб-китобларни аъзо мамлакатлар валютасида амалга оширишни таклиф этганди.
Маълумот учун, «Ислом саккизлиги» (D-8) ташкилотига 1997-йилда асос солинган бўлиб, унга Бангладеш, Миср, Индонезия, Эрон, Малайзия, Нигерия, Покистон ва Туркия аъзолик қилади. «Ислом саккизлиги» ташкилотининг асосий мақсади унга аъзо давлатларнинг жаҳон иқтисодиётидаги мавқеини ошириш, савдо муносабатларини диверсификация қилиш, савдо-сотиқ учун янги имкониятлар яратиш ҳамда халқаро қарорлар қабул қилишда ташкилотга аъзо мамлакатларнинг иштирокини ошириш ва мамлакатлар аҳолисининг турмуш даражасини яхшилашдан иборат.