Яхши меҳмонхоналари, сифатли хизмати ҳамда меҳмондўстлиги билан Туркия инвестициялар ва янги стратегиялар ёрдамида Европанинг бадавлат саёҳатчилари учун муҳим маданий манзилга айланмоқчи.

Бунда тажрибали мутахассис Меҳмет Нури Эрсой томонидан бошқараладиган Туркия маданият ва туризм вазирлигининг ўрни катта. Вазирлик спорт мусобақалари ва фестиваллар ёрдамида қисқа муддатга қолишни талаб қиладиган халқаро тадбирлар ишлаб чиққан. Бу ҳаракатлар эса бадавлат шахсларнинг мамлакатга ташрифини сезиларли даражада оширган.

Вазирлик сайёҳлар учун меҳмонхоналардан экскурсия қилиш учун имтиёзлар яратган. Туристик жойлар сонини кўпайтириш мақсадида эса йил давомида олиб бориладиган археологик қазишмалар кўламини кенгайтириб, «Келажак учун мерос» лойиҳаси доирасида қазишмалар сонини 172 тага eтказди. Масалан, Бергама вилоятида олиб борилаётган қазишма ва реставрация ишлари туман ва унинг атрофидаги шаҳарларга туризм даромадларидан фойдаланиш имконини бериши керак.

Вазирлик томонидан сайёҳларга ташриф вақтидан ташқари иншоотлар ва қадимий шаҳарларни зиёрат қилиш имконини берувчи «тунги музейлар» каби инновацион концепциялар яратилган. Ушбу ташаббус Афродисиас каби очиқ осмон остидаги музейларга ташриф буюрувчилар сонининг рекорд даражада ошишига олиб келди.

Туркия маданият ва туризм вазири Меҳмет Нури Эрсой туризм мавсумини 12 ойга узайтириш орқали 81 вилоятнинг барчасига сайёҳларни жалб қилмоқчи.

Туркиянинг асосан Мармара ва Ўрта ер денгизи минтақалари мамлакат туризм даромадларининг 80 фоизини ташкил қилади. Эгей минтақаси тахминан 10% улушга эга бўлса, қолган 10% Қора денгиз минтақаси ва Анадолунинг бошқа минтақалари ўртасида тақсимланган. Бошқа ҳудудларга туризмни олиб бориш билан бирга, сайёҳлар сони ва даромадни ошириш асосий мақсадамиздан бири. Биз учун энг муҳим масалалардан бири Эгей қирғоғи: маданий бойликлари, қирғоқлари ва табиий ресурсларига бой бўлишига қарамасдан, у туризмда озроқ суст. Эгей қирғоқларини сайёҳларнинг кун тартибига олиб чиқиш учун саъй-ҳаракатларимизни давом эттирамиз, – дейди Меҳмет Нури Эрсой.

Бой ва атроф-муҳитга эътиборли сайёҳларнинг ҳотиржамликни биринчи ўринга қўйишини билган вазир Эрсой, туризм объектларининг барқарорлик сертификатларини олишини таъминлаш учун жадал ҳаракат қилмоқда. Ҳозирда Туркиядаги тахминан 21 000 меҳмонхонадан 16 000 дан ортиғи барқарорлик сертификатига эга.

Туркияни 200 дан ортиқ ўлкага танитган Туркия туризм ташвиқот ва ривожлантириш агентлиги (ТГА) мамлакат нафақат «денгиз, қум ва қуёш»да дам олиш, балки табиат саргузаштлари, круиз туризми ва кўк круизлар, велосипед ва бошқа спорт турлари, археологик ва маданий саёҳатлар, диний йўналишлар ва гастрономик тажрибалар каби туризм йўналишларини кенг ташвиқот қилмоқда. Истанбул, Измир ҳамда Бодрум дунёга машҳур Мишлен гастрономик қўлланмасига киритилгани муваффақиятнинг яққол далили. Туркиянинг туризм соҳасидаги муваффақиятининг яна бир исботи Анқара ва Гордион қадимий шаҳарлари UNESCO’нинг Бутунжаҳон мероси рўйхатидаги объектларидан ўрин олгани.

Қайд этиш керак, Туркияга 2023 йилда 56,7 миллион турист ташриф буюрган. Мамлакат туризмдан тушган даромади 54,3 миллиард доллар тенг. Турк расмийлари, туризмдан тушган даромади билан яқин келажакда дунёнинг энг муҳим учинчи туризм давлати бўлишни мақсад қилган. Шунингдек, расмийлар Туркия бой сайёҳлар томонидан энг кўп танланган йўналишлардан бири бўлишни режалаштирмоқда.