Энди Ўзбекистонда фақат биринчи фарзанд туғилганда суюнчи пули берилади
Янги қарорга кўра, энди барча аёллар биринчи фарзанди учун суюнчи олади, иккинчи фарзанд учун эса суюнчи пули фақатгина «Ижтимоий ҳимоя ягона реестри»га киритилган аёлларга берилади. Қолган барча ҳолатларда нафақа тўланмайди.
Вазирлар Маҳкамаси 4 март куни «Ўзбекистон Республикаси Ҳукуматининг айрим қарорларига баъзи ижтимоий нафақаларни тўлаш тартибини такомиллаштиришга қаратилган ўзгартириш ва қўшимчалар киритиш тўғрисида»ги қарорини қабул қилинди.
Norma’нинг қайд қилишича, 2024 йил 1 апрелдан бошлаб фарзанд туғилганда бериладиган бир марталик нафақа пули:
- биринчи фарзанди учун — барча аёлларга;
- иккинчи фарзанди учун — фарзанд туғилган пайтда «Ижтимоий ҳимоя ягона реестри» ахборот тизимига киритилган оиланинг аъзоси бўлган аёлларга расмийлаштирилади.
Қолган барча ҳолатларда нафақа тўланмайди.
Нафақа олиш учун аризани давлат хизматлари маркази ёки ЯИДХП орқали бериш мумкин.
Ўзгартириш Вазирлар Маҳкамасининг 2023 йил 20 октябрдаги 550-сон қарорига 4-илова — «Туғилганликни қайд этиш билан боғлиқ комплекс давлат хизматларини кўрсатишнинг Маъмурий регламенти»га киритилмоқда.