Назарбоевнинг қизига алоқадор компания утилизация тўловини йиғишдан маҳрум қилинди
«Оператор РОП»нинг Алия Назарбоева билан алоқадорлиги айтилмоқда.
Қозоғистон ҳукумати «Жасил даму» давлат компаниясига утилизация тўловлари бўйича оператор функцияларини юклади, бу функциялар аввал хусусий «Оператор РОП» компанияси томонидан бажарилган. Бу ҳақда Вазирлар Маҳкамаси сайтида хабар берилди.
Компания собиқ Президент Нурсултон Назарбоевнинг қизларидан бири Алия Назарбоевага алоқадорлиги айтилмоқда.
«‘Оператор РОП’ МЧЖнинг утилизация тўловини маъмуриятлаштириш ва тегишли маблағларни тасарруф этиш бўйича фаолияти тўхтатилди. Утилизация тўлови ҳисобига яратилган активлар давлат мулкига ўтказилди», дейилади хабарда.
Мамлакатдаги норозилик ва тартибсизликлар фонида давлат раҳбари Қосим-Жўмарт Тўқаев «РОП Оператор» МЧЖга нисбатан «утилизация тўловини тўхтатиш» чораларини кўришни топширган. Президентнинг фикрича, бундай вазифа билан хориждаги каби давлат ташкилоти шуғулланиши керак. Тўқаев йиғимлар ставкаларини ҳам қайта кўриб чиқишни таклиф қилган.
Ўз навбатида компания вакили Президентнинг буйруғига бўйсунишини маълум қилган ва «қонунга қатъий мувофиқ» ишлаганлигини таъкидлаган.
Маълумот учун, «Оператор РОП» чиқиндиларни йиғиш, ташиш, қайта ишлаш ва йўқ қилиш, тўловларни утилизация қилишни ташкил этиш билан шуғулланган. Йиғим автомобиль ишлаб чиқарувчилар, расмий импортерлар ва мамлакатга автомобиль олиб кирувчи жисмоний шахслардан ундирилади.
Қозоғистон чиқиндиларни қайта ишлаш операторлари уюшмаси раҳбариятига яқин бўлган РБК манбасининг айтишича, компания республиканинг биринчи Президенти Нурсултон Назарбоевнинг кенжа қизи Алияга алоқадор. Компаниянинг собиқ Президент қизи билан алоқаси борлиги ҳақида kz.media ва eurasianet порталлари ҳам ёзган.