Bugatti Sur Mesure шахсийлаштириш дастурини ишга туширди
Лойиҳадаги биринчи модель Bugatti Chiron Pur Sport бўлди.
Bugatti ўзининг гиперкарлари учун Sur Mesure деб номланган шахсийлаштириш дастурини ишга туширди. Бу ҳақда «Коммерсантъ» хабар берди.
Қайд этилишича, Bugatti Sur Mesure лойиҳасидаги биринчи модель 1500 от кучига эга Bugatti Chiron Pur Sport купеси бўлиб, у 1931 йилги Франция Гран-присида ғалаба қозонган Луи Широн ва Ахил Варцининг Bugatti Type 51 хотирасига бағишланган.
Автомобиль ушбу гиперкар учун махсус ишлаб чиқилган иккита рангга бўялган ҳамда унга қўлда «32» рақами чизилган. Қизил рангли EB дизайни ҳам купедаги кашталар каби қўлда ишланган. Марказий консоль қора анодланган алюминий панель ҳамда кумуш ҳарфлар билан безатилган.
«Bugatti Sur Mesure мижозларига Bugatti гиперкарларининг кузови ва ички безаги учун чексиз имкониятлар таклиф этилади, уларни исталган ранг ва материаллар билан безаш мумкин», дейилади хабарда.
Аввалроқ Porsche компанияси Vision Gran Turismo виртуал суперкарини тақдим қилгани ҳақида хабар берилганди.