БМТ ва уч давлат келишуви: Украина дони юкланган биринчи кема Одесса портидан жўнаб кетди
Украина инфратузилма вазири Александр Кубраков Украина, Россия, БМТ ва Туркия тегишли келишувларни имзолаганидан сўнг маккажўхори юкланган биринчи кема Одесса денгиз портидан жўнаб кетганини маълум қилди. Портда яна 16 та кема ўз навбатини кутмоқда.
Украина, Россия, БМТ ва Туркия тегишли келишувларни имзолаганидан сўнг Украина маккажўхориси юкланган биринчи кема Одесса денгиз портидан жўнаб кетди. Бу ҳақда Украина инфратузилма вазири Александр Кубраков маълум қилди.
Кубраковнинг сўзларига кўра, Разони кемаси Сьерра-Леоне байроғи остида портни тарк этган. У Ливандаги Триполи портига йўл олган. Бортда 26 минг тонна маккажўхори бор.
Инфратузилма вазирининг қўшимча қилишича, Одесса портида яна 16 та кема ўз навбатини кутмоқда. Унинг таъкидлашича, Украина маккажўхори экспорти бўйича дунёда тўртинчи ўринда туради.
«Анадолу» агентлигининг ёзишича, кеманинг жўнаб кетганини Туркия Мудофаа вазирлиги тасдиқлаган. Агентлик маълумотларига кўра, кема Истанбулга 2 август куни етиб боради. Шаҳар қирғоқларида назорат ўрнатилгач, кема Ливан томон йўналишини давом эттиради.
Келишув
Аввалроқ Украина ва Россия Қора денгиз орқали Украина ғалласи экспортини қайта тиклаш бўйича келишув имзолиши тўғрисида хабар берилди.
Кейинчалик Москва ва Киев 22 июль куни БМТ ва Туркия билан Украина ғалласини экспорт қилишни ташкил этиш бўйича алоҳида келишувлар имзолади. Шартномаларга кўра, дон учта портдан: Одесса, Южний ва Черноморскдан экспорт қилинади.
Киев портларни миналардан тозаламайди: кемалар ўтиш учун хавфсиз йўлаклардан фойдаланилади. Жараённи назорат қилиш учун Россия, Украина ва Туркияни ўз ичига олган мувофиқлаштирувчи марказ ташкил этилган.
«Россия кемалари томонидан транспорт эскорти кутилмайди, Украина портларида Россия вакиллари бўлмайди: текширувлар турк сувларида қўшма гуруҳлар томонидан амалга оширилади», — деди Украина Президенти девони раҳбари маслаҳатчиси Михаил Подоляк.
Украина донининг экспорти Россиянинг Украинага ҳужуми туфайли тўхтатилганди. Reuters агентлигининг ёзишича, шу сабабли Одесса портида 20 миллион тоннага яқин дон қолиб кетган.
Россия дон экспортини тўсиб қўйишга алоқадорлигини рад этиб, портларни Украинанинг ўзи тўсганига ишора қилган.